Ronayoxanê TV10 û Can TVyî ra Huseyîn Narli (Okkeş Unlubayir) yê ke 9ê çeleyî de bajarê Bochumî yê Almanya de nêweşîya kanserî ra dinyaya xo bedilnaye Merkezê Kulturê Elewîyan ê DAKME yê Dormund de ame yadkerdene. Embazê Narliyî û xeylêk sîyasetmedarî tewrê merasîmî bîyî.

Merasîmê yadkerdişê ke bi tafînayîşê çira dest pêkerd de cinîya Narliyî Ayfer Unlubayir qisey kerd. Unlubayire vat: ''Zerrîya to tim semedê Kurdîstanî eştêne. To pê heskerdişî marşê Kurdîstanî goştarî kerdêne. Qewimîyayîşanê Kurdîstanî cuya to bewlî kerdêne. Pê pîlbîyayîşê têkoşînî enerjîya to zî pîl bîyêne. Ti Kurdîstano azad nêdî la tim vatêne Kurdîstan do rojêke bibo azad.''

Serekê AABFî Huseyîn Matî zî vist vîrî ke Narliyî têkoşînê elewîyan û kurdan de zaf kede daye û vat: ''Ez ey ra zaf çî musaya.'' Embazê ci yê karî Zeynel Gulî zî vat înan hermra  û mamosteyê xo yo erjîyaye vînî kerd. Nuştox Fuat Kav û Hemsereka MAR-DEFî  Fîdane Kabayel vat ê do mîrasê ey bidê domnayene. Reyna Nuştox Mehmet Bayrak, Can TVyî ra Şukru Yildiz, embazê Narliyî  yê karî Alî Koyluce û Pîr Mustafa Misirî zî derheqê Narliyî de qisey kerd û vat o do çirey nêro vîrakerdene.

Kêna Narliyî Evîne serê tabûtê babîye xo de deyîra ''Lo wer Meke'  ya Ayfere Duztaş vate. Dostanê Narliyî o bi deyîran kerd raşt. Narli badê merasîmî goristanê merkezê Bochumî de ame definkerdene.