Endamê Meclîsê Lozanî yê Swîsre û Hemserekê Partîya Keskan a Lozanî Illias Panchardî rewşa Sûrîye û Rojawanî ya peyêne ANFyî rê ercnaye.

Panchardî bale ante sîstemê hemserekîye yê Rojawanê Kurdîstanî ser û vat: ''Her şaredarîye hetê hemserekanê cinî û camêrdan ra bi hawayêkê kolektîfî yena îdarekerdene. Şar de îradeyo kolektîf est o.Babeta demokrasîyî de zî heman çi est o; rixmê hêriş, zehmetî û kêmasîyan zî herêman de rêxistinîyêka demokratîke est a. Babeta ekolojî û ê bînan de nêzdîbîyayîşê hûrmetî est ê. Projeyê demokrasî, paştdayîş û averwazîye aver şinê.''

Panchardî îfade kerd kerd ke şarê Rojawanî mîyanê şertanê zehmetan de modelê xo awan kerdo ke no model seba ameyoxê Sûrîye eşkeno bibo mîsal. Ganî bizanîyo ke hinî Sûrîye de caardişê dewleta netewe zehmet o. Goreyê mi paradîgmaya konfederalîzmê demokratîkî, sîstemê kantonan yan zî sîstemê federalî seba ameyoxî şert ê. No zî Rojawan de est o. Coka ez venga Wezîrê Karanê Teberî yê Swîsre û Endamê Konseya Federale dana ke wa Rojawanî bipawê û paştî bidê modelê ci.

Seba pawitişê Rojawanî asta sîyasîye de çîyî est ê ke ganî bêrê kerdene. Ganî Swîsre û dewletê Ewropa yê bînî hinî çekan nêroşê Tirkîya. Ganî Swîsre olîgarkanê tirkan rê ambargo bikera. Sembolîk zî bê ganî ma bieşkê gamanê destpêkan bierzê. Ez venga komelê Swîsre zî kena ke wa paştî bidê komelê kurdan û seba kurdan têbigêrê.''