Di generalê Iraqî hetê artêşa tirke ra kişîyabî. Wezîrê Karanê Teberî yê Iraqî Fuad Hisênî derheqê mesele de hempayeberzanê xo reyde telefon de qisey kerd.  Hisênî pêvînayîş de derheqê hêrişê dewleta tirke yê vera herêma Sîdekanî ya Hewlêrî de zanayîşî dayî wezîranê bînan. Hetê bînî ra Hisênî pêvînayîşê telefonî de wezîranê bînan reyde pare kerd ke eke Tirkîya reyna hêrişêkê winasênî bikera ganî ê tewirêkê hemparî bimojnê.

Hisênî Sekreterê Pêroyî yê Yewîya Dewletan ê Ereban Ehmed Ebul Geyt, Wezîrê Karanê Teberî yê Misirî Sameh Şukrî, Wezîrê Karanê Teberî yê Urdunî Eymen El-Sefadî, Wezîrê Karanê Teberî yê Arabîstanî Feysel Bên Ferhan û Wezîrê Karanê Teberî yê Kuweytî Şêx Ehmed Nessar El Mihemed El- Sebahî reyde telefon de qisey kerd.

Vervatoxê Wezîrê Karanê Teberî yê Iraqî Dr. Ehmed El-Sehafî eşkerayîye daye û vat: ''Birayan qetî kerd ke ê do paştî bidê ma û hêrişanê dewleta tirke şermezar bikerê. Ganî dewleta tirke cade hêrişanê xo vindarê.''