Badê îtîrafê Serekê verênî yê Dayîreyê Îstîxbaratî yê Fermandarîya Pêroyî Pekînî yê Qrikerdişê Parisî Wekîla Partîya Çepe ya Almanya Ulla Jelpke veng da ke wa qirkerdiş reyna bêro cigêrayene sîyasetmedarê kurdî Almanya de bêrê pawitene.
Serekê verênî yê Dayîreyê Îstîxbaratî yê Fermandarîya Pêroyî Îsmaîl Hakki Pekînî kanalêkê televîzyonî yê Tirkîya de vatbi ganî îdarekarê KCKyî têna Qendîl de nê Ewropa de zî bêrê hedefgirewtene.
Pekînî îtîraf kerd ke qirkerdişo ke 9ê çeleyî yê 2013 de paytextê Fransa Paris de ame kerdene û Ronayoxanê PKKyî ra Sanîne Cansiz, Temsîlkara KNKyî ya Parisî Fîndane Dogan û Endama Têgêrayîşê Ciwanîye yê Kurdan Leyla Şaylemez ameyî qetilkerdene hetê hêzanê Tirkîya ra ame kerdene.
Badê îtîrafê Pekînî Wekîla Partîya Çepe ya Almanya Ulla Jelpke ven da Fransa û Almanya . Jelpke ya ke heta ewro derheqê Qirkerdişê Parisî û falîyetanê îstîxbaratê tirke MÎTî yê Almanya de xeylêk vernîyazî dayî waşt ke wa serebûtê qirkerdişê cinîyan şorişgêran ê kurdan newe ra bêro cigêrayene.
Jelpke ya ke rewşe ANFyî rê ercna bale ante ser ke terorê dewlete leteyêkê rejîmê Erdoganî yo vat: ''Qiseyê Pekînî na babete de îtîrafê muhîm ê û sebebê cigêrayîşê neweyî yê. Vatişanê Peknî ra yeno fehmkerdene ke sîyasetmedarê kurdê ke Almanya de yê tehluke de yê. Tîya berpirsîyarîya pîle ya hukmatê almanî esta. Hukmato federal ganî nê vatişî ser o vindero û sîyasetmedaranê kuranê ke welatê ci de yê bipawo. Almanya eşkena wina mesajêk zî bido Tirkîya. Vera nê tedîdanê Tirkîya cewabo tewr hole wedartişê qedexeyê PKKyî yo.''
