Kadikoyê Îstanbulî de bi wesîleya serrgêra Komployê 9ê Teşrîna Verêne yo ke Rayberê Şarê Kurdî Abdullah Ocalanî ame kerdene, hetê HDK, Partîya Çep a Keske, HDP, DBP û rêxistinanê komelê sîvîlî ra bi nameyê Rayraşîyayîşê Azadîye çalakîya protestoyî ameye kerdene. Pîya herêma Marmara bajaranê derûdorî xeylêk kesî tewrê çalakîye bîyî.

Qeza de heme nuqtayî hetê polîsan ra gerîyayî binê ablûqa û Hemvervatoxa HDKyî Esengule Demir û Mayê Haştîye Narenciye Acar û Hanife Gumuş ê ke Îzmîrî ra ameybî, ameyî destbendkerdene. Hetê bînî ra verê otobusanê ke Tekirdagî ra ameyî ame girewtene.

Wekîlê Partîya Çep a Keske Burcugule Çubuk û Çîçek Otlu zî Rihtim de hetê polîsan ra gerîyayî binê abluqa. Wekîle Otlu vat, "Ma do rixmê heme zextan tecrîdî protesto bikerê. Ma do vera tecrîdê serê Rayberê PKKyî Abdullah Ocalanî têkoşîn bikerê. " 

Wekîle Çubukçu zî vat, "Ganî ma vera nê zilmî sere wedarê. Ganî vera rejîmê AKPyî û zextê polîsan ma sere wedarê. Ma wazenê tecrîdê zîndanan wedarê, ma sûcdar nîyê. Rejîmê AKPyî sûcdar o ke şer wazeno. Wa biciwîyo têkoşînê azadîye. Ma do miheqeq ser bikewê. "

Hemvervatoxê HDKyî Cengîz Çîçek û Hemvervatoxê Partîya Çep a Keske Gîgdeme Kiliçgun Uçar û xeylêk wekîlî verê Peykerê Bogayî de gerîyayî binê ablûqa. Wekîlan bi sloganan cewab da.

Grûbêka bîne ke Dayîkê Haştîye zî tede bî ver bi Peykerê Bogayî rayra şîyî sloganê sey “Bijî berwxedana Rojava” û “Bijî Serok Apo” vatî.

Hemvervatoxê HDKyî Cengîz Çîçekî binê ablûqa de eşkerayîye daye û nê vatî: “Wedartişê tecrîdî verê haştîye akeno. Ma tîya ra eşkera Wezîrîya Edaletî ra persenê; Zîndanê Îmraliyî de kamyew huqûq yeno caaerdene? Avûkat û merdime Birêz Ocalanî çiwext do bieşkê heqê xo yê fermî yê pêvînayîşî bişuxulnê. Ma semedê protestokerdişê  komployî tîya ameyî pêser. Zîhnîyetê komplokerî Kadikoy de zî xo mojna. Ma reyna vanê Komployê 9ê Teşrîna Verêne vera şaranê Tirkîye û şarê kurdî ame kerdene. Komployî ra nata welat hema tengayî ra nêxelisîyayo. Çareserîya meseleya kurdan yena manaya çareserkerdişê problemanê Tirkîya. Êyê ke wazenê şaran biverdê pê û serê dişmenîye ra cebanê xo pirr bikerê, ma vera înan tîya de yê. Ma do tim her firset de haştîye û azadîye biwazê.” 

Badê eşkerayîye wekîlî zî tede şar bi slogananê vera tecrîdî şi banê Rêxistina HDPyî ya Kadikoyî.

Aktîvîstê TJA zî tede grûbêka bîne zî Parka Yogurtçu ra bi slogananê “Selam selam İmrali rê hezar selamî”, “BijÎ berxwadana zindanan”, “Bijî Serok Apo” û  “Bijî berxwadana İmrali” rayra şîye. 

Polîsan verê Peykerê Bogayî de hêriş kerd, xeylêk kesî destbend kerdî. Kafeyan de zî xeylêk kesî bi kelemçeyanê peykîyan ameyî destbendkerdene.