Endamê Komîteya Rayberdişî ya PKKyî Duran Kalkanî ANFyî rê qisey kerd û 1ê Gulane Roşanê Karker û Kedkaran ercnaye.

Qiseykerdişê Kalkanî ra beşêk wina yo:

''Ma 1ê Gulane yê neweyî de yê. 1ê Gulane sebba karkeran roja yewîye, paştdayîş û têkoşînî yo. 1ê Gulane sembolo tewr xurt ê têgêrayîşê sosyalîstî yê global o. 1ê Gulane karker û kedkaran, sosyalîzmî reyde bîyo yew. Çira wina yo? Eşkera yo ke semedo ke gonîya şehîdan ameya rijnayene  wina ya. Wayîrê têkoşînêkê pîlî yo coka wina yo. Ma 1ê Gulane yê şarê xo û pêro dinya fîraz kenê û venga her kesî danê ke 1ê Gulane de têkoşînê demokrasî û azadîye aver bero.

Kurdî û Kurdîstan pê Hemleya 'Wextê Azadîye' 1ê Gulane pêşwazî kenê. Ma pê hêvîdar ê ke no 1ê Gulane do bibo wesîleya rijîyayîşê AKPyî, azadîya Rayberîye. Ma zî zîret kenê ke 1ê Gulane de hemleya xo bivisnê asta tewr berze. Coka ma vengê şarê xo danê ke dormeyê rubê 1ê Gulane de vejîyo meydanan. 1ê Gulane ganî bibo roja geşkerdişê têkoşînî

Ma sey PKK partîya kedkar û karkeran ê. Xeta partîya ma zî xeta azadîya cinîyan ser o ronîyaye. Partîya ma 'Partîya Karkeran a Kurdîstanî' raştîya karkeran temsîl û îfade kena. Partîya ma dima tay vurîyaye zî fikrê sosyalîzmî ser o xo awan kerd. 

Rayber Apoyî rixmo ke binê tecrîdî de yo meseleyê nikayênî yê dinya tim raşt ercnayî, çareserîyî peyda kerdî û rêxistin kerdî. Rayber Apoyî binê nê şert û mercan de paradîgmaya xo ya newîye afernaye û 'Manîfestoyê Komelê Demokratîkî' nuşt. Seba ercnayîşê rewşa sosyalîzmî ya ewroyîne ganî no manîfesto bêro wendene, Teorîya Modernîteya Demokratîke' bêra famkerdene. Rayber Apoyî sosyalîzm û demokrasî destê dewlet û îqtîdaran ra xelisnayî.

Bingeyê hîşmendîya sosyalîzmî yê Rayber Apoyî de azadîya cinîyan esta. Komelo ke tede cinîyî azad nîyê qet nêbeno azad û têdûşt. Bingeyo bîn ê Teorîya Modernîteya Demokratîke zî komelo ekolojîk o. Sîstemê modernîteya kapîtalîste û îdeolojîya kapîtalîzmî xoza rijnenê, cuye texrîb kenê. No vîrusê Korona zî netîceya modernîteya kapîtalîzmî de vejîya werte. Dewletî ewro binê nameyê 'pawitişî' de prosesê Korona de komel gênê binê kontrolî. 

Raştîya ke Rayber Apoyî sey 'dewrê kanserbîyayîşî yê sîstemê dewlete û sîstemê modernîteya kapîtalîste'  pênase kera na ya. Nê pênase û ercnayîşê Rayber Apoyî na babete de seke feryad û qîrayîş ê. Têgêrayîşê sosyalîzmî babetanê ekolojî, azadîya cinîyan de qels mendo.

PKK wina vîneno ke serfîrazîya têkoşînê karkeran pabesteyê awankerdişê sîstemê ekolojîk û azadîya cinîyan o. PKK nê babetan ser o zaf zî xebetan keno. Bi taybetî partîya ma bingeyê Jineolojî de xîret keno ke têkoşînê cinîyan rêxistin bikero û aver bero. Sosyalîzmo raştikên mîyanê PKKyî de ciwîyeno. 

Bêguman têgêrayîşanê karkeran de meseleyê îdeolojîkî yê pîlî estê. Ganî nê têgêrayîşî sosyalîzm fam bikerê û bidê ciwîyayene. Coka ganî têgêrayîşê partîyan meseleya rêxistinîye çareser bikerê, xeta îdeolojîke ser o rêxistinîya xo aver berê, pîl bikerê. Nê esasî ser o têgêrayîşê karker û kedkaran hewceyê têkoşînê netîcegîrî yê.

Ganî vera AKP-MHPyî nê esasî ser o têkoşînêko winasên bêro kerdene. Rijîyayîşê AKP-MHPyî xora qîm nêkeno. Ganî pê îdeolojîya sosyalîzmî rayberîya kedkaran, karkeran, cinî û ciwanan de cuya demokratîke, azade, komelo demokratîk bêrê awankerdene.

Ganî Teorîya Modernîteya Demokratîke ya Rayber Apoyî zêdêr bêra famkerdene. Kurdîstan de, mîyanê PKKyî de astêke de pratîkê têkoşînê karker û kedkaran esto. Tirkîya de no têkoşîn qels o. Seba ke no têkoşîn bihêzêr bibo îdeolojî û teorîya raştikêne hewce kenê. Têkoşîno îdeolojîk û têkoşîno rêxistinkî yewbînan ra cîya nîyê. Ganî nê raşt bêrê famkerdene û hemleyêka newîye ya sosyalîste bêra afernayene.''