Endamê Konseya Rayberdişî ya PKKyî Duran Kalkanî derheqê sîstemê tecrîd, îşkence û qirkerdişî yê Îmraliyî û xoverdayîşê Rayberê Şarê Kurdî Abdullah Ocalanî de ANFyî rê qisey kerd.

Qiseykerdişê Kalkanî ra tay noqtayê girîngî wina yê:

''Komployê 15ê Sibate ra dima hêvîya her kesî şikîyabî. Tay kesan vatêne ke hînî PKK do tasfîye bibo û kurdî bin bikewê. Çunke her kesî wina bawer kerdêne ke vera sîstemê Îmraliyî têkoşîn û xoverdayîş mumkîn nîyo. La Rayber Apoyî vat ke 'Ez do tîya de têkoşîn bikera.' Ey seba ney zî venga şarê ma û têgêrayîşî kerd. Ma paştî daye nê vengdayîşî. Şarê ma xora perwerê Rayberîye bi. Rayber Apoyî esasê manaya cuye de xoverdayîşê xo yê Îmraliyî da destpêkerdene. Ey girîngîye daye manewîyatî. 

Rayber Apoyî heta ê çaxî tecrubeyê pîlî vistbî destî. Rayber Apo Îmrali de kêmasîyan, xeletîyan, çareserîya meseleya kurdan û komelê kurdan ser o fikirîya. Ey manaya fikiryayîşê xo aver berde. Rayber Apoyî hema destpêkê Komployî de persê xo dayî destpêkerdene. Ey bi raştî ercna ke ganî vera hemle tewirêkê senînî bigêro. 

Terz, fîkriyat, manewîyat, metod û dîsîplînê Rayber Apoyî Îmrali de berhemê girîngî vetî werte. Rayber Apoyî Îmrali de pawitişnameyê xo bi xorinî nuştî û pêşkêşê şarê ma kerdî. Ey formulasyonê Kurdîstanê Azadî, Rojhelatê Mîyanênî yê Demokratîkî û paradîgmaya çareserîya meseleya kurdan zî Îmrali de afernayî. Rayber Apoyî bi nê xîretanê xo xîretê tasfîyekerdişî, qirkerdiş û hêrişan asteng kerdî. 

Rayber Apo 25 serrî yo mîyanê sîstemê Îmraliyî de binê tecrîdî de yo. Sey Îmraliyî cayêko bîn çin o ke tede dişmenîya vera kurdan hende yena kerdene. No feraseto qirker wazeno Kurdîstanî bikerê warê kiştişê kurdan. La vera ney xoverdayîşo tewr xorin zî Îmrali de yeno kerdene.

Îmrali de xora îşkence est o. Hetê bînî ra nê 25 serran de çi qewimîyayo tesîrê Îmraliyî zî kerdo. Dewleta tirke vatêne qey pê nê kerdişanê xo Rayber Apoyî aciz bikera û teslîm bigêra. La şar qetî Rayber Apoyî ra fek vera nêda. Yanî dewleta tirke nêeşkaye têkilîya Rayber Apoyî ya bi kurdan bibirna. Ewro pêro şarê kurdî, cinî û ciwanê kurdî, şarê dinya, şarê Tirkîya, roşnvîr û sîyasetmedarî wazenê ke tecrîd wedarîyo, Rayber Apo qisey bikero ke çareserîya meseleyan pêşkêş bikero.

Rayber Apo wayîrê ê hêzî yo ke eşkeno hertim xo newe bikero. Sîstemê Îmraliyî çend giran bibo zî nêeşka verê newerabîyayîşê Rayber Apoyî bigêro. Nika ganî ma nê xoverdayîşê Rayber Apoyî fam bikerê. Ma deyndarê Rayber Apoyî yê. Hînî şiknayîşê tecrîdî qîm nêkeno ganî ma bi têkoşînêkê xurtî Rayber Apoyî azad bikerê. Azadîya Rayber Apoyî do azadîya Kurdîstanî û demokratîkbîyayîşê Tirkîya xo de bîyara. Coka ez venga pêro kesan dana ke wayîrê erk û mesuldarîyanê xo vejîyê û bi pêro hêzê xo tewrê têkoşînê azadîya Rayber Apoyî bibê.''