Endamê Komîteya Rayberdişî ya PKKyî Duran Kalkanî ANFyî rê qala Mazlûm Dogan, Gurbetellîye Ersoz, Alîşêr Koçgirî û Seyîd Evran kerde.

Qiseykerdişê Kalkanî ra tay noqtayê girîngî wina yê:

''Embaz Seyîd Evranî mektuba xo ya peyêne de ma ra xatir waşto. Ma zî tira vanê ke wa zerrîrehet be. Qelem, kamera û çeka to destê embazanê to de yê. Ê karê xo rê dewam kenê.

Mazlûm Doganî ra heta Seyîd Evranî yew artêşa çapemenîya azade est a ke hetê têgêrayîşê azadîye ra ronîyaya. 28ê êlule serrgêra şehadetê embaz Alîşêr Koçgirîyî ya. Embaz Alîşêr, Rustem, Çîçeke û Rozerîn Xakurkê de şehîd bîyî. Teşrîna verêne de embaze Zeynepe û Gurbetellîye Ersoz şehîd bîyî. 

Tarîxê têkoşînê ma de tarîxê xebatanê çapemenîya azade zî est o. Ma serranê 90an ra nata karê propaganda û ajîtasyonî çapemenîye ser ra kenê. Rayber Apo bi xo serkêşê nê xebatan o. Serra 1978î de kombîyayîşê partîye de bire dîyaye ke kovarêke bêra vetene. Heyetê kovare Amed de ame awankerdene ke ez zî tede bîya. Rayber Apoyî bi xo nê xebatî rêxistin kerdêne.. Embaz Mazlûm Dogan û Hayrî zî endamê esasî bîyî. 

Dima nê xebatî Amedî ra vilayê Xarpêt, Dêrsim û Çewlîgî bîyî. Ma qapaxê rojnameyê Serxwebûnî hêverî Amed de viraşt. Di qapaxê bînî de Çewlîg de pê daktîloyî virazîyayî. Huseyîn Durmuş mesuldarê Serxwebûnî yê Çewlîgî bi. La dima o tepişîya. Ma zî bire daye ke yew kes Serxwebûnî vila bikero. 1979 ra dima embaz Mazlûm Dogan zî tepişîya, keyeyê ma yê çapkerdişî îfşa bi û xebatê ma yê weşanayîşî vindertî.

Konferansê PKKyî yê 1. de 1981 de bire dîyaye ke Serxwebûn Ewropa de bêro amadekerdene û 1982 de Serxwebûn newe ra vejîya. Serxwebûnî hûmara xo ya 500. êlule de vete! Tarîxê kurdan de reya verêne yew weşane hende emirderg bîyo. Peynîya 1980an de Serxwebûn newe ra vilayê Vakurê Kurdîstanî û Tirkîya bi. Tîya ra zî vilayê Başûr, Rojawan û Rojhelatê Kurdîstanî bi. 

Serranê 80an ra dima Vakur de serewedaritişê şarî qewimîyayî. O çax Ozgur Gundem, Ozgur Halk, Yeni Ulke vejîyayêne. Dewleta tirke ya faşîste pê hêrişan, bombarduman û tepiştişan kerd ke vengê nînan bibirna la nêeşkaye. Nê têkoşînê çapemenîye bi pîlbîyayîşî û şehadetan dewam kerd. Bi seyan kedkarê çapemenîye resayî û ê bîyî milîtanê xurtî.

Ez û Mazlûm Dogan ma pîya xeylêk xebitîya. Embaz Mazlûm Doganî her kes perwerde kerdêne, rêxistin kerdêne û hertim serkêşîya xebatan kerdêne. Embaz Mazlûm Dogan coka nameyê yew xete yo. O xetêka şorişgêrîye ya pîle bi. 

Embaz Alîşêr Koçgirî vera dişmenî wayîrê hişmendî, kîn û hêrs bi. Ey nê hîsê xo zî tim pê xebatanê xo mojnayî. O hem fermandarê gerîlayan hem zî xebatkarê çapemenîye bi. Ey Koçgirî ra heta Başûrî xeylêk erk û mesuldarî kerdî.

Embaze Gurbetellîye Ersoz sey cinîyêka serkêşe hem karê çapemenîye hem zî karê şorişgêrîye kerdî. Ey wextê tewr çetinî de mesuldarîya karanê çapemenîye girewte xo milî. Aye koyan de zî bi tecrubeyanê xo xebatê xo kerdî. Aye pêro meseleyî cade çareser kerdêne. Embaze Gurbetellîye (Zeynepe) rêxistinîya YAJKî de zî serkêşîye kerde.

Embaz Seyîd Evranî xeta Amed-Dêrsimî ra heta Rojawanî karê çapemenîye kerdî. Eu bi seyan kadroyê çapemenîye perwerde kerdî. Embaz Seyîdî seba ke şarî rê qala gerîlayan û raştîyan bikero şewe û rojê xo dayî. Ey nêzanayêne ke qefilîyayîş çi yo. Ey tecrubeyê pîlî xo pey de verdayî. Ey pêro xebatê xo bi xîretanê pîlan kerdî û erjî afernayî.

Nê embazanê ma karê partîye û çapemenîye yew kerdî. Nê embazê ma hem sey şorişgêran hem zî sey rojnamegeran tim aktîf bîyî. Ganî rojnamegerî teyna sey karêkî nêzdîyê xebatanê xo nêbê. Çunke yew armancê ma est o. Ma kenê ke cuya azade awan bikerê, meseleya kurdan çareser bikerê û Kurdîstanî azad bikerê. 

Xeta çapemenîya azade xeta şehîdanê çapemenîya azade ya. Na xete xeta Apogîran a. Xora tay zehmetî û giranîyê na xete est ê. La têkoşîno tewr pîl zî na xete de yo. Dişmen tewr zaf hetê na xete ra yeno teşhîrkerdene û komel tewr zaf hetê na xete ra yeno perwerdekerdene. Nê esasî ser o ez reyna embazanê ma Mazlûm, Alîşêr, Zeynepe û Seyîdî û şexsê înan de pêro şehîdanê çapemenîya azade bi rêzî yad kena. Ez şagîrtanê înan rê zî serkewtiş wazena.''