Endamê Komîteya Rayberdişî ya PKKyî Duran Kalkanî cewab da persanê Medya Haber TVyî.

Qiseykerdişê Kalkanî ra tay noqtayê girîngî wina yê:

''Hemleya 'Rayber Apoyî rê azadîye, Meseleya Kurdan rê Çareserîya Sîyasîye' serra xo dekerde. Rayber Apo 25 serrî yo binê tecrîdî de yo û kurdî zî hendê nê serran hê xover danê. Seke zanîyeno nê rojan de Komîteya Wezîran a Konseya Ewropa derheqê caardişê heqê hêvîye de ancî serrêke daye Tirkîya. Têgêrayîşê ma vera na bire tewirê xo eşkera kerd. Na bire birêka sîyasî ya. 

A raşte Ewropa û dewleta tirke vatêne qey rewî ra PKK do tasfîye bikerdêne la nêeşkayî. Nika serrêke wextê Tirkîya est o. La ancî do nêeşka. Hetê bînî ra ancî girîng o ke Komîteya Wezîran neçare menda ke tecrîd bikera rojdemê xo. No xêrê xoverdayîşê şarê ma ra bi. Eke ma têkoşînê xo û xoverdayîşê xo hîna zixm bikerê ma eşkenê 'hêvîya' Ewropa û dewleta tirke bişiknê. Verê ma de yew serre est a. Yanî ma hinî resayê fînalî. Ma çendek bi xurtî têkoşîn bikerê eşkenê hendê netîce bigêrê. Ma do ser bikewê.

Ma hê dekewenê serra diyîne ya hemle. Ma ganî serra diyîne de têkoşînêkê hîna bi tesîrî bikerê û seferber bibê. Hinî roşnîye ameya dîyene. Ma do netîceya têkoşînî bigêrê. Ma ganî çalakîyanê bitesîran bikerê û wayîrê Rayber Apoyî vejîyê. Bi nê armancî 13ê teşrîna verêne de Amed de zî do mîtîngêko pîl bêro kerdene. Ganî ma bi xurtî tewrê nê mîtîngî bibê. Wa her kes nê mîtîngî de bivîno ke bê Rayber Apoyî cuye nêbena. 

Startê Komployê Mîyanneteweyîyî 9ê Teşrîna Verêne ya 1998î de amebi dayene. Hêzanê Şerê Dinya yê Hîrêyînî no komplo dabi destpêkerdene. Înan îmhaya Rayber Apoyî hedef kerdêne çunke ê fikranê Rayber Apoyî ra tersayêne. Yanî Komplo şexsê Rayber Apoyî de  vera azadîya kurdan, têkoşînê kurdan û seba çinkerdişê îradeyî û seba qirkerdişê kurdan ame kerdene. Nê 26 serran de kurdan rê nêheqîyê pîlî ameyî kerdene. Berpirsîyarê nê neheqîyan ê sey Amerîka û Brîtanya ganî şarê kurdî rê uzrê xo biwazê.

Hetê bînî ra komployî ra nata têkoşînêko girîng zî ame kerdene. Komplo seba îmhakerdişê Rayberîye amebi kerdene la ser nêkewt.. Rayber Apo hîna zaf şinasîya û dinya wayîra fikranê ci vejîyaye. Cinîyî, ciwanî, kedkarî ûsn. Rayber Apoyî sey lîderê xo qebul kenê. Eke ma serra 27ine ya komployî de xeta serkewtişî de têkoşîn bikerê do komployî parçe bikerê û azadîya Rayber Apoyî bîyarê ca.

Par 1ê teşrîna verêne de xeta fedayîtîye de Anqara de embazanê ma Rojhat û Erdalî çalakîyêke kerdbî. Ganî her kes na çalakîye hol fam bikero. Ewro gerîlayî na xete ser de xo ver danê û derban danê artêşa îşxalkere ro. Nê şerî de dewleta tirke bi giranî bin kewena la kena ke binkewtişê xo binimna. 

Hetê bînî de Herêmanê Pawitişî yê Medya de dewleta tirke kilîdkerde menda. Şarê ma yê Başûrê Kurdîstanî wa raştîyan bivîno û wayîrê xoverdayîşê gerîlayan vejîyo. Gerîlayî hê rûmetê Başûrî pawenê. 20ê teşrîna verêne de Başûr de weçînayîşî est ê. Wa şarê ma nê weçînayîşî de raya xo bido ê kesanê vera îşxalkeran û xayînan.

Seba demokratîkbîyayîşê Tirkîya azadîya Rayber Apoyî elzem a. Coka ganî roşnvîr, sîyasetmedar, hunermend, cinî û ciwanê Tirkîya ganî azadîya Rayber Apoyî biwazê. Eke şarê Tirkîya wazenê nê krîzan ra bixelisê ganî paştî bidê têkoşînê azadîye. Ganî 13ê teşrîna verêne de Amed de bi mîlyonan kesî bêrê pêser.''