Torra Ziwan û Kulturê Kurdan û Platformê Ziwanê Kurdkî Change.org de seba ke kurdkî biba ziwanêko fermî 21ê sibate de kampanyayêke dabi destpêkerdene. Kampanya do heta 15ê Gulane Roşanê Ziwanê Kurdkî dewam bikera û dima îmzayê ke arê dîyayê do bierşawîyê dezgehan.

Kampanya bi kurdkî (kirdkî, kirdaskî û sorankî), bi îngilîzkî, fransizkî, almankî û tirkî dîyaye destpêkerdene dewam kena.

Kampanya armanc kena ke kurdkî biba ziwanêko fermî, verê asîmîlasyonî bêro girewtene û kurdkî çin nêba. Metnê kampanya de wina vajîyeno: ''Kurdkî ganî biba wayîrê statuyêkê fermî û ziwanê perwerdeyî.''

Hemserekê Komeleya Cigêrayîşanê Kurdan Eyup Subaşiyî venga pêro kurdan da ke wa tewrê kampanya bibê.

Mamosta Subaşiyî vat: ''Heta destê ma ra yeno ma na kampanya derûdorê xo de vila bikerê. Tena yew merdim zî eşkeno na kampanya biresno bi hezaran kesan û bi se hezaran îmzayan arê bido.''

Subaşiyî girîngîya ziwanê dayîke viste vîrî û pare kerd ke şerto verên ê kurdayetîye wayîrvejîyayîşê kurdkî yo.