Huqûqnas Ercan Kanarî derheqê destsernayîşê Şaredarîya Colemêrgî de ANFyî rê qisey kerd. 

Kanarî vist vîrî ek wexto ke Mehmet Siddik Ataş wezîfeyê hemşaredarîye ra ameyo dûrvistene derheqê ci de bira mehkumîyetî çin bîya. Kanarî ard ziwan ke bi nê kerdişî huqûq ameyo binpaykerdene û vat: ''Tayînkerdişê karmendêkî sey qeyûmî teyna rejîmanê kolonyalîzmî de est o. Îdareyê herêmîyî bingeyê demokrasîyî yo esas o. Destsernayîş yew metodêkê îdareyî yê rejîmê neteweya serdeste yo. No vera îradeyê şarê kurdî despotîzm o.''

Kanarî îfade kerd ke dewleta tirke vera kurdan huqûqê dişmenîye ana ca û vat: ''Rejîmê zorbazî de pêro heqê muxalîfan yenê xespkerdene. Ma ney rê vanê huqûqê şerî yê dişmenî. Wextê AKPyî de huqûqê şerî yê dişmenî hîna giran bîyo. AKP pêro muxalîfan sey dişmenî vîneno. Wexto ke AKP bi îqtîdar 49 hezar tepişteyî est bîyê nika 330 hezar tepişteyî est ê.''

Kanarî dîyar kerd ke ganî vera destsernayîşê îradeyê kurdan her kes tewirê xo bimojno. Kanarî vat: ''Nika qalê nermbîyayîşî yeno kerdene. Ney de şaşîyê Serekê CHPyî Ozgur Ozelî est ê. Vano pêvînayîşê înan pozîtîf bîyî. La 1ê Gulane de merdimî tepişîyayî, qeyûm ame tayînkerdene, mehkemeyî pirr bîyî. Yanî partîya muxalefete erkê xo nêana ca. Ganî merdimî bi hawayêkê topyekûnî vera nê bêhuqûqîyan wurzê we û bêveng nêbê.''