Endamê Konseya Rayberdişî ya KCKyî Mustafa Karasuyî Medya Haber TVyî de rojdem ercna.

Ercnayîşê Karasuyî wina yê:

''Çar serran ra dima Îmrali de Rayber Apo de pêvînayîş ame kerdene. Selamê Rayber Apoyî moral da ma. Seke zanîyeno Bahçelîyî zî tay vengdayîşî kerdbî. Şarê ma zere û teber de çar serran ra nata vera tecrîdî têkoşînêko pîl kerd û zor da dewleta tirke. Netîceya ney de Îmrali de pêvînayîş ame kerdene.  Yanî no pêvînayîş keda têkoşînê bi serran o.  Pêvînayîş de Rayber Apoyî vato ke tecrîd nêqedîyayo. No zaf girîng o. Ganî têkoşînê vera tecrîdî û seba Rayber Apoyî dewam bikero.

16ê teşrîna peyêne de Koln de rayraşîyayîş û mîtîng est o. Ganî şarê ma yê Ewropa bi xurtî tewrê nê çalakîyan bibo. Şarê ma dîyo ke bi têkoşînî ma eşkenê netîce bigêrê.

Têgêrayîşê ma 50 serrî yo vera qirkerdişî têkoşîn keno. Nê rojan de Bahçelîyî destê xo dergê DEM Partî kerd û qalê haştîye kerd. Çunke îqtîdarê AKP-MHPyî zere û teber de mîyanê zorîye de yo. Ê wazenê ke bi çareserîya meseleya kurdan zorîye ra vejîyê. La hetê bînî ra vera kurdan şerê qirkerdişî kenê. Îqtîdarê AKP-MHPyî keno ke şerê qirkerdişî yê vera kurdan bi netîce bikero. Yanî nîyetê înan ê seba çareserîye samîmî nîyo.

Hetê bînî ra îqtîdar vera DEM Partî kayêk amade keno. Bi destsernayîşê şaredarîyan çimê DEMî tersneno ke wa qarişê têkoşînê azadîye nêbo û qalê meseleya kurdan nêkero.

Bahçelîyî vato ke wa Rayber Apo Meclîs de qisey bikero û PKKyî vila bikero. Çîyo winayên mumkîn nîyo. La hetê bînî ra Bahçelîyî zî fam kerd ke muxatabo verên Rayber Apo yo. Vanê ke Qendilî reyde pêvînayîşê telefonî ameyo kerdene. Çîyo winayên zî çin o. 

Ganî her kes nê prosesî de bi baldarî têbigêro û mexapîyo. Xora şarê ma, têgêrayîşê ma zî û şarê Tirkîya zî çareserîye wazenê. La çareserîye ganî çareserîyêka demokratîke biba.

Seba ke têkoşînê kurdan bêro eciqnayene nê qeyûmî yenê tayînkerdene. Îradeyê şarê ma nêşinasîyeno. Îqtîdarê AKP-MHPyî kurdan rê waştişanê xo ferz keno, bi qeyûman zî şantah keno.

Mêrdînî rê seba îşxalê Rojawanî, Xalfetî rê seba mesajê Rayberîye û Êlihî rê zî seba şiknayîşê têkoşînê cinîyan qeyûmî ameyî tayînkerdene. Aseno ke nê tayînê qeyûman do dewam bikerê. Coka vera nînan wa tewirêko xurt bêro mojnayene. Ganî şarê ma û hêzê demokrasîyî pîya têbigêrê û têkoşînê hempatî bikerê. Ganî têkoşîn bêro berzkerdene. Wa şaredarî zî nê prosesî de bi aktîfî têbigêrê, erkanê xo ancî bîyarê ca.  Eke kurdî wazenê ke nasname, ziwan û kulturê xo bipawê ganî xo ver bidê. 

Ez şehîdanê çalakîya TUSAŞî bi rêzî yad kena. Nê embazanê ma vera qirkerdişê kurdan tewirêk vet werte. Ganî no tewir hol bêro famkerdene. Hetê bînî ra şer dewam keno. TUSAŞ merkezê viraştişê çekan bi. Coka ame hedefkerdene. Embazanê ma xora bi mektubanê xo mesajê hewceyî dayî. 

Şîdetê vera cinîyan bi giranî dewam keno. Şîdetê vera cinîyan pêro komelî eleqedar keno. Kurdîstan de xêrê Rayber Apoyî ra têkoşînê cinîyan aver şi. La ancî zî şîdet nêqedîya. 25ê Teşrîna Peyêne Roja Têkoşînê Vera Şîdetê Serê Cinîyan a. Ez venga pêro welatperweran, demokratan dana ke vera şîdetê serê cinîyan têkoşîn bikerê. 

Partîya ma PKK 46 serrî verî ronîyaye û ê çaxî ra nata bi xurtî têkoşîn keno. Hêzê PKKyî texmînan ra pîlêr o. Coka hêrişê vera PKKyî bênetîce manenê. PKK do nêro binkerdene. PKK bi qewetin û do hîna bibo qewetên. PKKyo ke bi felsefeya Rayber Apoyî têgêreno partîya şehîdan û cinîyan a. PKK ma ra yan zî çîyanê madîyan ra îbaret nîyo. PKK yew şar o, ruhê ci est o û hertim têkoşîn keno. Ez serrgêra ronîyayîşê partîya ma 27ê Teşrîna Peyêne fîraz kena, ronayoxê na partîye Rayber Apoyî bi rêzî selam kena û pêro şehîdanê ma yad kena. PKK do vîrameyîşê şehîdan bipawo û hesreta şehîdan bîyaro ca.''