Endamê Komîteya Rayberdişî ya PKKyî Murat Karayilanî Bernameyê Taybetî yê Stêrk TVyî de rojdem ercna.

Qiseykerdişê Karayilanî ra tayê noqtayê girîngî wina yê:

''Her çiqas pêvînayîşê bi Rayber Apoyî ame kerdene zî Îmrali de tecrîd dewam keno. Rayber Apoyî pêvînayîş de Omer Ocalanî rê vato ke 'eke îmkanî bêrê afernayene o eşkeno rolê xo seba çareserîye kay bikero.' Dewlet Bahçelîyî teyna eşkerayîye daye, qisey kerd. Naye ra ber hetê dewlete ra seba çareserîye gamêka zelale nêameye.  AKPyo ke dişmenîya kurdan keno raşta zî çareserîye nêwazeno. Eke biwazo ganî gamanê raştikÊnan bierzo.

Rejîmê Baasî rijîya. Eke rejîmî 2011 de demokrasî biweçînayêne û meseleya kurdan çareser bikerdêne wina do nêbîyêne. Nika her kes goreyê xo hesaban keno. Tirkîya zî wazena ke Sûrîye goreyê xo dîzayn bikera. AKPyî waştêne ke mutefîqê ci bibo îqtîdarê Şamî. La HTŞ bi hukmat. Dewleta tirke zî neçare mende ke ney qebul bikera. Aseno ke dewleta tirke HTŞyî rê tayê çîyan ferz kena.

Dewleta tirke armanc kena ke Sûrîye de kurdî wayîrê statuyêkî nêbê, Sûrîye binê hîmayaya ci de bimana. La hêzê bînî do destûr nêdê ney. Çunke planê hêzanê mîyanneteweyîyan do goreyê asayîşê Sûrîye şekl bigêro. 

Sûrîye de û Rojhelatê Mîyanênî de dewrêko newe dest pêkeno. Dewleta tirke ancî wazena ke kurdî teber de bimanê û Rojawan nêbı wayîrê statuyî. Nê prosesî de kurdî ganî stratejîyêka hempare bikerê. Dewleta tirke wina îdîa kena ke kurdî neteweyêke nîyê. Kurdî ganî eqsê ney bimojnê. Ez sere de PDK, YNK, PYDyî venga pêro partî û hêzanê çar parçeyanê Kurdîstanî dana ke nê prosesê tarîxîyî de goreyê mesuldarîyanê xo têbigêrê, menfaetanê xo de ney menfaetanê neteweyîyan de israr bikerê. Eke yewîye nêba destkewteyêk zî do nêbo. 

Dewleta tirke heta ke zereyê xo de meseleya kurdan çareser nêkera nêeşkena biba dosta kurdanê bînan. Bi taybetî Başûr de tayê kesî dewleta tirke de dostîye kenê. Wa her kes na dostanîya xo newe ra biercno. Êyê girîngî menfaetê şarê ma yê. Wa çew xeletîye nêkero. 

Rojawanê Kurdîstanî de zî yewîye ganî bêra caardene. Rojawan de tayê kurdî xo sey 'muxalefetî' pênase kenê. Tayê selahîyetdarê ENKSî sey vervatoxanê dewleta tirke qisey kenê. Wa wina nêbo. Nê kurdî ganî şarê kurdî rê xizmet bikerê. 

Dewleta tirke vana 'PKK Rojawan de yo coka ez do ey çin bikera.' No polîtîkaya şarê taybetî ya. Dewleta tirke nêvana PYD/YPG. Vana PKK/PYD/YPG. Çîyo winayên çin o. Rojawan de şarî est ê; PKK çin o. Ma sey PKKyî Rojawan de nîyê. Yew eleqeyê ma yo organîk bi rêxistin û partîyanê Rojawanî çin o. Rojawan de paradîgmaya Rayber Apoyî şinasîyena. La no nêno a mana ke PKK uca de yo. Nê çîyî polîtîkayê şerê taybetî yê. 

Artêşa Sûrîye ya Milî (SMO) sey HTŞyî nîya, pabesteya Tirkîya ya û holîya Sûrîye nêwazena. Dewleta tirke wazena vera kurdan Sûrîye de şer bikera. La seba ney destûrê Amerîka lazim o. Hetê bînî ra dewleta tirke wazena ke mîyanê şaranê Rojawanî de nîfaq bikera û bi cergan mudaxele bikera. Wa şarê ma yê Rojawanî, bi taybetî eşîrê ereban û partîyê ereban hayîdar bibê. Hêzo ke do Sûrîye demokratîk bikero Îdareyo Xoser o.

Til Rifet û Şehba de birêka raşte dîyaye û şar uca ra ame vetene. Dima dewleta tirke hêrişê vera Minbicî dayî destpêkerdene. Dewleta tirke zûran kena û vana 'Til Rifet û Şehba de ma ser kewtî.' La dima dewleta tirke xo tîya ra apey ant. Nika yeno vatene ke Minbic de zî pêkerdiş ameyo caardene û dewleta tirke xo ancena. Ma wina eşnawit ke goreyê pêkerdişî Minbicî ra hêzê SMO û hêzê Meclîsê Leşkerî zî do xo biancê.

Hetê bînî ra vera Qereqozaxî û Tişrînî hêrişî est ê. Dewleta tirke wazena hêrişanê xo hîra bikera û verê xo bida Kobanê. La nê cayan de QSD est o. Seke ma vat û Fermandarîya QSDyî eşkera kerd ke Minbicî ra hêzanê kurdan goreyê peymane xo anto. Yanî dewleta tirke Minbic nêgirewta. 

Sûrîye de îqtîdaro newe yeno awankerdene û nînan pare kerd ke wa şer vindero. Kaolîsyono Mîyanneteweyî zî şer nêwazeno la Tirkîya wazena. Îdareyo Xoser û QSD nê prosesî de bi serkewtişî aver şinê. Taktîkê înan ê xoapeygirewtişî raşt ê. Ez naye zî vaja ke ganî şarê ma hinî koç nêkero. Rewşa şarê Efrînî cîya ya. Naye ra ber şarê ma wa cayê xo de bimano. 

Şarê kurd, ereb û asûrî-sûryanîyan heta nika pîya hereket kerd û xo ver da. No zî îradeyêkê pîlî mojneno.

Axir ma prosesêkê tarîxîyî de yê. Seba Rojawanî tehluke pîl o la îmkanî zî pîl ê. Wa şarê Rojawanî xo hol rêxistin bikero, amade bibo. Ma wina hêvî kenê ke şarê ma do yew bibo û ser bikewo. Ma her kesî rê serkewtiş wazenê.''