Başê dîyinî yê mulakatê Endamê Komîteya Rayberdişî ya PKKyî Murat Karayilanî yo ke da Medyanewsî ewro ame weşanayene. Cewabanê Karayilanî ra tay  wina yê:

Eke PKK hetê Amerîka û Ewropa ra lîsteyê terorî bêro vetene, netîceyê ci yê polîkî senî benê?

Heta ewro ne Ewropa ne zî dinya de qet mehkemeyêk derheqê PKKyî de qerarê sey terorîstî nêgirewto. Cunke PKK gureyanê winayênan nêkeno. PKK yew rêxitina terorî nîya. Ewro Kurdîstan de terorê dewleta tirke esto. PKK vera hêrişan xopawitişê meşrûyî aver beno. Şarê ma estbîyayîş, heqanê xo yê kulturkî û ziwanê xo paweno û PKK zî xopawitişê meşrûyî yê naye keno. Eke ewro Birîtanya û Fransa bêrê destsernayene ziwan û kulturê înan bêrê qedexekerdene, ê se kenê? Xover danê. Şarê kurdî zî xover dano. Ewro HPG hêzê pawitişê meşrûyî yê şarê Kurdî yo. PKK û Rayber Apo temsîlkarê fermî yê şarê kurdî yê. Heqîqeto esasî no yo. La Amerîka û Ewropa semedê qezencanê xo yê sîyasî û ekonomîkî PKK kerdo lîsteyê terorî. Eke PKK lîsteyê terorî ra bêro vetene, îhtîmalo pîl o ke şer yeno vintedene û demêko newe yê haştîye kewo dewre. Eke Amerîka û welatê Ewropa durust bê û raşta mewazê kurdî hetê îşxlakeran bêrê qetilkerdene, eke raşta wazenê kurdî azad biciwîyê, ganî şexsê PKK û Rayber Apoyî de neheqîya ke vera kurdan bena biqedînê. Nê welatî bi qeraranê xo paştî danî şerî.  Hemkarîya teror û şîdetê dewleta tirke kenê.  Ma tîya ra veng danê; şima wextê qerarê Lozanî yê 2923yî ra nata kurdan rê neheqîye kenê. Hinî nê sîyasetê xo yê xelet û neheqî vindarnê. Têkoşînê azadîye yê kurdan têkoşîno meşrû yo. Nê tekoşînî rê mevajê teror. Hemkarê qirkerdişanê vera Kurdîstanî mebê.

Êyê ke nê roportajî wanenê û hema PKKyî nas nêkene, înan rê şima xo senî îfade kenê?

Verî wa no heqîqet bêro zanayene ke şarê ma şaro qedîm yê Kurdîstan, Rojhilatê Mîyanênî û herêma Mezopotamya yo. Gama ke Rojhilatê Mîyanênî newe ra ame dîzaynkerdene. Pê pêkerdişê Lozanî estbîyayîşê kurdan ame înkarkerdene û Kurdîstan mabênê çar dewletan de ameye parekerdene. Na neheqîyêka zaf pîle bî. Şarê ma se serrî yo verê naye de milê xo çewt nêkerd la dewleta îşxalkere bi hewayêkê wehşî yena şarê ma ser. O wextî ra heta nika Kurdîstan de tradejîyê pîlî ameyî ciwîyayêne. Serranê 70yan de gama ke vera kurdan sîyasetê qirkerdişî ameyî rayraberdene Rayber Apo sey ciwanêkê kurdî unîversîte de na raştîye ferq kerde. Şexsê şarê kurdî de merdimîye gerîyayêne binê lingan. 1973 de serkêşîya Rayber Apoyî de grûbêka ciwanan ê kurd û tirkan dest pê têkoşînî kerd û sey PKKyî heta ewro ame. La dewleta tirke endamê NATOyî bî û heme NATO vera têkoşînê azadîye yê kurdan paştî dayê dewleta tirke.Pê çimê dewleta tirke mesele girewte dest. Coka sey terorî dî. Têna sey terorî nêdî, eynî wextî sey terorî ramojna. Mesele 1985î de Serekwezîrê Swêdî Olaf Palme rê sûîqast kerd û eşt milê PKKyî. Serra 98î de vera Rayber Apyî Komployê 9ê Teşrîna Verêne  dîya destpêkerdene. Serkêşîya Amerîka de pê komployê mîyanneteweyî Rayberê ma ame Tirkîya rê ame teslîmkerdne. Pê nê komployî çînkerdişê nê têgêrayîşî ame waştene la Rayber Apoyî Îmrali de komplo pûç vet û bi paradîgmaya newîye cewab da. Bi na paradîgma PKK bi newe û pîlêr bi. PKK têkoşînê azadîye yê şaran keno. PKKyî bi sîyasetê xo Rojhelatê Mîyanênî de rayîrêko bîn akerd. PKK vera neheqîya modernîteya kapîtalîste xoverdayîşê şaran o. PKK vengê heme merdiman ê bindestan o.

Ewropa de vera têgêrayîşê azadîye yê kurdan polîtîkayê krîmînalîzasyonî yenê reyraberdene. Şima naye senî ercnenî?

Xora sey tradîsyonî dewleta almanî 150 serrî yo vera şarê kurdî ya, Tim paştgêrîya Tirkîya kena. Qirkerdişê vera kurdan de heta Qirkerdişê Ermenîyan de zî engişta Almanya esta. Nika têna Almanya nê hêzê NATO zî tede yê. Kurdî têkoşînê heqdarî danê la welatê Ewropa nê heqîqetî nêvînenê. Semedê qezencanê xo zûlmê vera kurdan rê çimanê xo qefilnenê. Dost û embazê ma û enternasyonalîstê ke wazenê paştî bidê ma raştê zextî yen. Hetêkî ra vanê ê demokrat ê la hetê bînî ra şîdeto ke Kurdîstan de yeno kerdene rê benê hemkar. Ganî no sîyaseto xelet bêro caverdayene. Ma hêvîdar ê ke bi paştdayîşê enternasyonalîstan û demokratan dewaya azadîye ser bikewo. Na dewayêka heqdar a. PKK nîno tesfîyekerdene. Cunku PKK şar o, komel o.  Waştişê PKKyî û şarê kurdî yew o. PKK wazeno ke kurdî erdê xo yê zengînî de bi ziwan û kulturê xo azad biciwîyê. Eke nê dewletî zî vanê ê hetê azadîye de yê ganî sîyasetê xeletî yê vera kurdan caverdê.