Fetmandarê Qerargehê Merkezê Pawitişê Şarî (MPŞ) Murat Katayilanî cewab da persanê Medya Newsî. Qiseykerdişê Karayilanî ra beşêk wina yo:

''6 mengan ra nata artêşa tirke hêriş kena. Dewleta tirke serra 2021î xo rê bi taybetî plan kerde. Înan waşt ke na serre mewzîyanê ma yê Başûrî û Iraqî çin bikerê, gerîlayan tasfîye bikerê û merkezanê ma bêkoordîne war verdê. Senî ke înan vera Sûrîye 1998 de hêriş kerd û Rayber Apo esîr kerd nika zî no plan kerd. Reyna deletanê hegemonan ê sey Îngilîstan, Almanya û Amerîka paştî daye înan. Destpêkê serre ra nata Wezîrê Pawitişî yê Tirkîya şi Hewlêr, Bexdad û PDK kerd hemkarê xo. Înan wina hesab kerdêne ke Garê, Qendîl û cayanê bînan de gerîlayan tasfîye bikerê.

Coka înan 10ê sibate de nişka ra hêrişê Garê kerd. Dewleta tirke di rojan de resaye kamca leşkerê xo tede ca kerdî û nêeşkaye uca ra aver şora. Yanî şer hema zî uca de dewam keno. Dewleta tirke pê teknîk û bombardumananê hewayî wazena aver şora û îşxal bikera. La heta nika ser nêkewte çunke gerîlayan xo kerd newe, metodê neweyî şuxilnenê. Gerîlayî metodê şerê tunelî û metodê têgêrayîşê bi komanê qijan şuxilnenê.  Aseno dewleta tirke no nêpawitêne. Dima ke ê pê hesîyayî hê bin kewenê xîret kerd ke şarê xo û dinya ra nê binkewtişî binimnê. Ê eşkera nêkenê ke nika şerêko pîl qewimîyeno. Dewleta tirke semedo ke xo binkewtişî ra bixelisna çeka kîmyewîye şuxilnena, bi nê hawayî qanûnanê mîyanneteweyîyan binpay kena. Na çarçewe de Avaşîn, Zap û Metîna de şer dewam keno.

Dewletê îşxalkerî rixmê meseleyanê xo vera Kurdîstanî yenê têhet, pê kenê la çar parçeyê Kurdîstanî nêeşkenê vera hêrişan bibê yew û sîyasetê hemparî bikerê. Kurdî bi lezabezî hewceyê yewîya neteweyîye û sîyasetê hemparî yê. PDK tewrê plananê dewleta tirke yê vera PKKyî bi. PDK parçeyêkê hêrişanê Tirkîya yo. Hêzê PDKyî gerîlayan gênê binê ablûqa, rayîran qefilnenê û bi nê hawayî konspetê şerî yê Tirkîya kenê temam. PDK vera îşxalê Tirkîya yê vera Başûrî vengê xo nêkeno. Dewleta tirke bax û baxçeyanê şarî vêşneno, sivîlan kişena ke paştî medê gerîlayan. PDK rixmo ke ney zaneno PKKyî sûcdar keno. Oyo ke zerar dano şarî dewleta tirke ya. Sîyasetê PDKyî raşt nîyo.

Vea kurdan xeylêk plan û kayî estê. Ma xîret kenê ke pê yewîya neteweyîye, sîyasetê hemparî nê kay û planan pûç bikerê. La semedo ke PDK Tirkîya reyde têgêreno nê waştişê ma ca nîyenê. Wina aseno ke hêvîya yewîye ya kurdan û dostan taloq bîye. Çunke sîyasetê kurdan menfaatê tay keyeyan û rêxistinan menfaatanê şarî ra ver de nanê ro.

Qetî yo ke dewleta tirke çeka kîmyewîye şuxilnaya. Dewleta tirke Başûrê Kurdîstanî de vera gerîlayan çeka kîmyewîye şuxilnena. HPGyî na babete de zaf eşkerayîyî dayî, dokumentî estê, dîmenî estê. Destê ma de tay parçeyê muhîmatan zî estê. La hêzê mîyanneteweyî na mesele peygoş kenê, rixmê hende vengdayîşê ma bêveng manenê. Çunke dewleta tirke endama NATOyî ya. Hêzê mîyanneteweyî eşkenê bêrê ê cayanê ke tede çeka kîmyewîye şuxilîyaye. PDK xora nê cayan de yo. Wa nê hêzî bêrê nê cayan de cigêrayîşî bikerê. HPGyî eşkera kerd ke Girê Sorî de 6 embazê ma pê çeka kîmyewîye şehîd bîyî. Girê Sorî sînorê Tirkîya de yo. Uca de tunelêk esto, ma embazê xo uca ra apey antî. Dewleta tirke nêkewte ê tunelî. Cenazayê embazanê ma hema zî uca de yê.

Dezgehê mîyanneteweyî eşkenê şorê uca û cigêrayîşî bikerê. Uca de hema zî rêçê çeka kîmyewîye estê coka dewleta tirke nêkewena ci. Eke ê pê ma bawer nêkenê wa heyetê xoserî bêrê. Dewleta tirke Kurdîstan de huqûqê şerî binpay kena. Wa dezgehî mudaxeleyê ci bikerê. Ma prosesê Garê de zî venga înan dabi û ma reyna danê wa heyetî bêrê cigêrayîşê xo bikerê, ê eşkenê tesbîtanê musbetan bivînê.

Hêzê globalî bin kewtî û hê xo cayanê îşxalkerdeyan ra apey gênê. Hînî şarê het welatî xopawitişê xo wa bîyaro ca. Rojawan, Sûrîye û Iraq de wa her kes xo bipawo.''