Endamê Komîteya Merkezî ya PKKyî Kasim Engîn Atina û Êrîvan de ame yadkerdene. Merasîmê yadkerdişî yê Êrîvanî de hêrişê vera HDPyî zî ameyî protestokerdene.

Atina

Paytextê Yunanîstanî yê Atina de bi seyan kesî pê vengdayîşê Têgêrayîşê Ciwanan ê Şorişgêran û Merkezê Kulturê Kurdan Meydanê Akademia de ameyî têhet û înan endamê Komîteya Merkezî ya PKKyî Kasim Engîn yad kerd û hêrişê qirkerî yê dewleta tirke yê vera Kurdîstanî protesto kerdî.

Çalakîye de posterê Ocalanî, alayê KCK, PKKyî û fotografê Kasim Engînî ameyî berzkerdene; sloganê 'Kiştox Erdogan', 'Bê serek cuye nêbena' û 'Biciwîyo xoverdayîşê PKKyî' ameyî vatene. Çalakîkerî ver bi Sersefirîya Tirkîya ya Atina rayîrî ra şîyî. Polîsan dormeyê sersefirîye girewte. Tîya de çalakîkeran nawnayîşêk kerd û vilawekî wendî. Nawnayîş de sîyasetmedarê kurdî Selîm Sadakî qisey kerd û pare kerd ke ganî şarê kurdî seba erjanê merdimîye têkoşîn bikero.

Êrîvan

Şêwirê Şarê Kurdî yê Armenîstanî, Kurdîstan Komîte, Yewîya Cinîyan ê Azadan (YJA) û temsîlkarê Rojnameyê Zagrosî paytextê Armenîstanî Êrîvan de kom bîyî û înan Kasim Engîn yad kerd û hêrişê dewleta tirke yê vera HDPyî  pê eşkerayîyêka hempare şermezar kerdî. 

Endama Koordînasyonê Kurdîstan Komîte û alîmê dînî Şêx Tahîr Biroyan qisey kerd û îfade kerd ke Engîn seba şarê kurdî rayberîye kerde. Biroyan dima bale ante hêrişê vera şarê kurdî ser û vat ke ganî cade şarê kurdî yewîya xo awan bikero.

Endama Meclîsê Kurdîstan Komîte Jênîka Qadir zî da zanayene ke ganî şarê kurdî her ca de vera faşîzm têkoşîn xurt bikero.

Endama Yewîya Cinîyan ê Azadan Lianna Mhoyan zî vat: ''Leyla Guven sembola şarê kurdî ya. Ê leylayêke rehîn gênê la bi hezaran leylayî do meydanan de bibê.''

Endamê Koordînasyonê Kurdîstan Komîte Mîlo Kalaşyanî zî vat: ''Şarê kurdî pê tepiştiş û kiştişî îradeyê xo ra fek vera nêdano.''