Şaristanê Lavrioyî yê Yunanîstanî de bi seyan kurdîstanijî kom bîyî û seba yadkerdişê endamê Komîteya Merkezî ya PKKyî Kasim Engîn û şermezarkerdişê hêrişanê vera Başûrê Kurdîstanî rayîrî ra şîyî.

Rayraşîyayîş rayberîya Têgêrayîşê Ciwanan ê Şorişgêran de şewa dişemeyî verê Kampa Lavrioyî de dest pê kerd û rayraşîyayîş de fotografê Rayberê Şarê Kurdî Abdullah Ocalanî û posterê Kasim Engînî, alayê PKK û KCKyî ameyî berzkerdene. Rayraşîyayîş de sloganê ''Biciwîyo Serek Apo'', ''Faşîst Tirkîya'' û ''Bê serek cuye nêbena'' ameyî vatene.

Dima çalakîya yadkerdişî ameye kerdene û derheqê Kasim Engînî de sînevîzyonêk ame mojnayene. Çalakîye pê sloganê ''Şehîdî nêmirenî'' qedîyaye.