Hêrişê vera banê HDPyî yê Kartalê Îstabulî bi çalakîyêke ame şermezarkerdene. Eşkerayîya ke verê banê qeza de ameye dayene Wekîla HDPyî Huda Kaya û xeylêk temsîlkarê partîyanê  sîyasîyan û rêxistinê komelê sîvîlî tewrê ci bîyî.

Eşkerayîye de verê Hemserekê HDPyî yê Kartalî Mete Aşnasî qisey kerd. Aşnasî qiseykerdişê xo yê kurdkî de vat: ''Seba ke kurdî wayîrê îrade û partîya xo vejîyenê eşt banê ma ser. Wa naye hole bizanê ke kurdan senî ke heta ewro çok nêda ewro ra tepîya zî do têkoşîn bikerê û çirey çok nêdê.''

Dayîka Haştîye Fîncan Akman zî kurdkî qisey kerd û vat: ''Şima se kenê bikerê, ma şima ra nêtersenê, ma edaletî pawenê, ma do ser bikewê. Ma kurdîstanij ê, ma herra Kurdsîtanî de berzeyê edaletî ramito û semedê zildayîşê nê berzeyî ma do têkoşînî rê dewam bikerê.''

Wekîle Huda Kaya zî vat: ''Ma zanê ke êyê ke hêrişê HDPyî kenê, çara patşî genê. La ê hinî qedîyayî, sibayê înan çîn o. Tarîx hinî pelê AKPyî qefilneno. Hinî peynîya nê hêriş, dizdîye û xirabîye yena. Newroza Amedî xora dersa tewr pîle daye îqtîdarî. Şarê ma lapata tewr pête daye piro. Coka wina  hêriş kenê. HDP partîya şarî ya, pê hêrişan nêqedîyena. La peynîya înan ameya. Ma hêvîya xo vînî nêkenê. Ameyox ê ma yo, ameyox ê haştîye û azadîye yo.''

Hemsereka HDPyî ya Kartalî Aygule Sincara ke eşkerayîye wende vat îqtîdar se keno wa bikero verê îradeyê şarî kurdî de do vîn bikero.