Seba Şaredarîya Sêrtî namzedê DEM Partî Safîye Alagaş û Mehmet Kaysî yê. 

Namzed Kaysî 1968 de Sêrt de dadîya xo ra bîyo. Kaysîyî heta nika xeylêk waranê sîyasîyan de erkî ardî ca. Kaysîyî ANFyî rê qalê weçînayîşan û armancanê înan kerd.

Kaysîyî bale ante ser ke bi taybetî serra 2013yî ra nata vera kurdan sîyasetê dişmenîye û tedayan yeno kerdene û vat: ''Tirkîya de rejîmê tekcamêrdî çi biwazo o qayde beno. Xespkerdişê qeyûmî ra nata şaredarîye de teyna terefgirê AKPyî est ê. Şaredarîye de her kes endamê AKPyî yo. Wextê ma de deynê şaredarîye 120 trîlyon bi, nika 400 trîlyon o. Qeyûmo nikayên zî xora namzedê AKPyî yo. 8 serrî yo înan dizdîye ra ber çîyêk nêkerd. Heyf ke îqtîdarê AKPyî Sêrt apey berd. Ma ney şarê Sêrtî wina vano.''

Kaysîyî ard ziwan ke ê seba ke xizmetê şarî bikerê bîyê namzed û vat: ''Sey partîye ma hê newe nênê şaredarîyan. Ma çar wextan no şaristan bê problem îdare kerdbi. Ez bi xo 35 serrî yo mîyanê sîyasetî de ya. Ma hêzê xo şarê xo ra gênê. Ma do şarê xo reyde bixebitê. Sêrt de hîrê ziwanî qisey benê. Ma do bi nê ziwanan şaredarîye îdare bikerê. Ma do kooperatîfan awan bikerê. Şaredarîya Sêrtî vurîyaya qereqolî. Her çî ra ver ma do şarê Sêrtî reyde şaredarîya xo destê qeyûman ra bixelisnê.