Kongreya Komeleyanê Demokratîkan ê Kurdîstanijan a Ewropa  (KCDK-E) derheqê Festîvala Kulturê Kurdan a Mîyanneteweyî ya 32. ya ke 21ê êlule de  do Frankfurtê Almanya de bêro kerdene eşkerayîye daye.

Hemserekanê KCDK-E Zubeyde Zumrut û Engin Severî veng da kurdan û dostanê înan ke wextê winayênî de ke vera ziwan û kulturê kurdan hêrişê qirkerdişî zêdîyayî wa her kes tewrbê festîvale bibo û vera tecrîdê serê Rayberê Şarê Kurdî Abdullah Ocalanî  û hêrişanê qirkerdişî vengê xo berz bikero.

Eşkerayîye de nê ameyî vatene: ''Festîvala Kulturê Kurdan a Mîyanneteweyî ya ke her serre yena kerdene emser do 21ê êlule de bajarê Frankfurtî yê Almanya de bêro kerdene. Sere de Almanya,  do Swîsre, Hollanda, Vakurê Fransa, Avusturya û Belçîka ra kurdîstanîjî û dostê ma tewrê festîvale bibê. Meclîs û federasyonanê ma semedê kiriştişê girseyî bi seyan otobus û wesayîtî hazir kerdî. Festîvala emserî do bi şîarê  'Daxirkerî û Tecrîtê Biskîne, Rêberti Azad Bike' bêro kerdene. Ma veng danê ke  wa şarê ma bi kincanê xo yê neteweyîyan û heme şorişgêr, demokratî zî bi ruhê xoverdayîşê Zapî tewrê festîvale bibê.''

KCDK-E derheqê rayîrê de zî detayî pare kerdî û vat levhayanê Autobahnî de do hetê festîvale bêro ramojnayene. Derheqê tren û S-Bahn de zî nê ameyî vatene: ''Kesê ke bi trenan  û S-Bahn yenê  wa hauptbahnhof de binişê tramvaya bi numreyê 17î ke ver bi Rebstockparkî şina. O tarîx de seba ke a xete de tamîr est o tramvay do heta Messe Festhalle şiro, ûca ra pê bi otobusan çew eşkeno şiro warê festîvale.

Ma semedê wesayîtan cayê parkî kîra kerdî. Embazê ma yê ke otopark de wezîfedar ê ganî hîşyarkerdişê înan bêrê goştarîkerdene.Ganî bi qetî meteryalê ke şewat vejenê û birîndar kenê merê ardene. Tewreyê paştî, bawil û parfum qetî nêgerîyenê zere. Coka çîyê ke ma vatî wesayîtan de biverdê, xo dê mîyarê warê festîvale.''