Hemserekanê KCDK-E Zubeyde Zumrut û Engin Severî û Vervatoxa TJK-E Aytene Kaplan derheqê serrgêra Komployê Mîyanneteweyîyî yê 15 sibate de eşkerayîye daye. Kombîyayîşê çapemenîye bajarê Dortmundî yê Almanya de Merkezê Komelê Demokratîkî yê Kurdan de ame kerdene.

Zubeyde Zumrut nê vatî: ''Vera sîstemê tecrîdî yê 26 serran bi mîlyonan kesî semedê azadîya Raryber Apoyî têkoşîn kenê. Ma 10ê teşrîna verên a 2023yî de kampanyaya 'Rayber Apoyî rê azadîye meseleya kurdan rê çareserîye' daye destpêkerdene. Kampaya ameye wayîrvejîyayene û rojdemêko muhîm afirna. La nê çalakîyî qîm nêkenê, têkoşînê ma bi hewayêkê qerardarî dewam keno. Ma Komployê 15ê Sibate çarçeweya na hemle de pêşwazî kenê. Strasbourg de do mesajêko xurt bêro dayene. 26 çalakwanê ke Parisî ra kewtî rayîr  14ê sibate de do biresê Strasbourgî. Hetê bînî ra ciwanê kurdan û enternasyonalîstî do 9ê sibate de dest pê rayraşîyayîşê dergî bikerê. Ma veng danê şarê xo ke wa 15ê sibate de saete 10.00 de Strasbourg bêro têhet. 15ê sibate yê emserî zaf muhîm o. Ganî şarê ma hewtî ra heta hewtayî verê xo bido Strasbourgî.''

Hemserekê KCDK-E Engin Severî zî vat ganî şarê ma bi ruhê seferberîye verê xo bido Strasbourgî.

Vervatoxa TJK-E Aytene Kaplan zî nê vatî: ''Ma wextêkê krîtîkî de yê. Rayraşîyayîşê Strasbourgî de hem semedê wedaritişê tecrîdê giranî yê serê Rayberîye hem zî semedê qedînayîşê plananê qirkerdişî do mesajêko gird bo. Ma do ûca bêrê pêser û vajê ke Birêz Abdullah Ocalan îradeyê ma yo. Sere de cinîyî ma veng danê heme şarê xo  û dostanê xo ke wa 15ê sibate de verê xo bidê Strasbourgî û wayîrê îradeyê xo bivejê. Tarîx, ziwan û estbîyayîşê kurdan binê tehdît de yo. Ganî her kes wayîrê erjanê xo ke afirnayî û nasnameyê ma yo ke bi têkoşînê 50 serran vejîya werte, vejîyo. Azadîya Rayberîye semedê estbîyayîş û statuyê kurdan zaf muhîm a. Ma pêro pîya 15ê sibate de Strasbourg de vajê azadîya Rayberîye azadîya ma ya.''