Hemserekîya Konseya Rayberdişî ya KCKyî eşkerayîya nuştekîye daye û nê vatî:

''Rayber Apo seba ke prosesê pêkewtişî biqedîyo û problemî bi rayîranê demokratîkan bêrê çareserkerdene keda pîle dano. Raybe Apoyî vatbi eke şertê bêrê pêardene o eşkeno prosesî zemînê pêkewtişînî ra bikerişo zemînê sîyasî û huqûqî. Ma zî sey têgêrayîşî vatbi ma vatişanê Rayber Apoyî esas genê. Heyetê DEM Partî bado ke Îmrali de Rayber Apoyî reyde pêvînayîş kerd partîyanê sîyasîyan reyde pêvînayîşî kerdî. No averşîyayîşêko pozîtîf o. Sîyasetê Tirkîya fîkr û pêşnîyazanê Rayber Apoyî ser munaqeşe keno. No çîyo ke muhîm o û eynî wextî de destpêkerdişo newe yo. Rayber Apo cedh keno ke tekîlîya kurd-tirkan newera raşt bikero. Coka Îmraliyî ra veng dano ke wa her kes berpirsîyarîya xo tarîxî bigîro xo ser.

Rayber Apo bi vatişanê xo komelî de hêvî û bawerî afirneno la tay îdarekarê AKPyî û tay programê medyaya îqtîdarî ke nînan esas genê hêvî û bawerîya şarî şiknenê. Senî ke hêrişanê vera Rojawanî de zî yeno vînayene îqtîdarê AKPyî polîtîkaya xorîkerdişê şer û pêkewtişan rayra beno. Hetêkî ra semedê qedînayîşê şerî Raybe Apoyî reyde pêvînayîşî yenê kerdene hetê bînî ra îqtîdar şer û pêkewtişan xorî keno. No yew paradoks o. Rayber Apo xîret keno ke bi keda pîle nê prosesî aver bêro la îqtîdar verê nê geno.

Vera şarî zextî zêdîyayî, vera şarê kurdî Rayber Apoyî heqaret yeno kerdene, tayînkerdişê qeyûman, hêrişê vera Rojawanî  nîyetê îqtîdarî ramojnenê. Tewr peynî de Şaredarîya Akdeniz de qeyûm ame cakerdene. Bi nê kerdişan wazenê cehdkerdişê Rayber Apoyî betal bikerê û şerî xorî bikerê.

Îqtîdarê AKPyî pîya bi çeteyanê SMOyî hêrişê Rojawanî keno. No zî tewirê ci yê vera kurdan mojneno ra.  Dişmenîya AKPyî ya vera kurdan nêqedîyaye. Na dişmenîye Rojawan de xo mojnena ra. Îqtîdarê AKPyî hêrişê  Îdareyê Xoserî yê Rojawanî keno ke îradeyê cuyeya hempare ya demokratîke yê şaran werte wedaro. Eşkerayo ke no îqtîdar wayûbiratîye nêwezano, şer û dişmenîye wazeno.

Hêrişê vera Rojawanî hêrişê vera merdimîye yê. Rojawan erjo hempar ê şaran o ke vera DAÎŞî semedê anorê merdimîye şer kerd. AKPyo ke tim hêrişê Rojawanî keno wazeno DAÎŞî newera bikero ganî. Şaro ke semedê vergirewtişê hêrişan şi Awbendê Tişrînî  hetê dewleta tirke ra ame bobmardumankerdene, qirkerdiş ame kerdene. Nê pêro sûcê şerî yê. Ganî her kes wayîrê Rojawanî bivejo.

Çalakîya Awbendê Tişrînî çalakîyêka zaf bimana ya. Ma şaranê Rojawanî semedê nê tewirê ci yê cesûrî selam kenê. Ma şehîdanê Tişrînî bi hurmet yad kenê û birîndaran rê şîfa wazenê. Na çarçewa de ma veng danê şarê xo û hêzanê demokratîkî ke wa prosesî raşt fam bikerê, wayîrê ci bivejê û vera her qeyde xîle û hêrişan hîşyar bê, tedbîrê xo bigîrê û yewîye û têkoşînî dahîna aver berê.''