Hemserekîya Konseya Rayberdişî ya KCKyî derheqê weçînayîşanê 31ê adare de eşkerayîye daye û nê vatî:

''Şarê kurdî vera qirkerdişan têkoşînê azadîye û estbîyayîşî dano. Bi des serran o ke dewleta tirke ya qirkere kena ke warê sîyasetê demokratîkî tesfîye bikero û rayîrê ci ra raqilno. Semedê nê zext, şantaj, surgun, tepiştiş, qirkerdiş û her qeyde caardişê teberê merdimatîye kerdî. Bi destê JÎTEM û Hîbulkonrayan bi hezaran cînayetî ameyî kerdene, welatperwerî ameyî qetilkerdene. La rixmê heme hêrişan nêeşkayî şarê kurdî û warê sîyasetê demokratîkî teslîm bîgerê. Warê sîyasetê demokratîkî xover da û xeta xo ya welatperwerîya demokratîke canêverda. Ma nê zaf erjîyaye vînenî û şexsê Vedat Aydin û Apê Musayan de heme şehîdanê demokrasîyî reyna bi rêzdarî yad kenê.

Ma vînenê ke namzedanê DEM Partî Vakurê Kurdîstanî  û Tirkîya de  heyecan afirnayo. Şar paştî dano namzedanê ci û zaf eleqa mojeno. Seba ke DEM Partî de sîstemê hemserekîye est o şar zafêr eleqdar beno. Hemserekîye vera nêzdîbîyayîşê xeletî yê vera xeta cinîya azade tewiro zelal ê şarî yo. Şarê ma bi tewirê xo yê Newroze dostî kerdî şa û dişmeno zalim qehrnayo. Eşkerayo ke do no tewir weçînayîş de zî xo bimojno ra. Seke yeno zanayene nê weçînayîşî warê demokratîkî de nêbenê, seba ke xîle û komployî bêrê betalkerdene ganî şarê ma zafêr şiro sindoqan ser. 

Ganî nê weçînayîşî de AKP-MHP û hemkarê înan şarê ma ra qet rayêke megerê. Wa qet çew teredut de memano, teberê namzedanê şarî de raya xo ê bînan medo. Îqtîdaro faşîst û hemkarê înan wazenê bi zext, xîle û komployan Kurdîstan de şaredarîyan bigerê û sîyasetê qeyûmî bikerê meşrû. Ganî şarê Vakurê Kurdîstanî destûrê nê medo. Reyna ganî cewabo pîl bidîyo xayînan û qetilkaranê JÎTEMî.  Nê ke kenê ke xo sey kurdan bimojnê ra destê înan de gonîya şarê ma est a. Nê bîyelê qetilkaran seba  ke têgêrayîşê azadîye ser mekewo hetê dewlete ra ameyî afirnayene û yenê şuxulnayene.  Ganî şarê ma yo ke înan zaf hole sarisneno, cewabêko heq kenê bido ci. Bi nê waştişî ma veng danê şarê xo ke wa şiro sindoqan ser û ma şarê xo namzedanê demokratîkan rê serkewtiş wazenê.''