Hemserekîya Konseya Rayberdişî ya KCKyî derheqê Qirkerdişê Gazî yê 1995î û Qirkerdişê Qamişloyî yê 2004î de eşkerayîyêke daye.

Eşkerayîye wina ya:

‘’Rixmo ke Qirkerdişê Gazî 30 serrî û Qirkerdişê Qamişloyî 21 serrî xo pey de verdayî hema zî nê vîrê şaranê ma de yê. Ma ancî nê qirkerdişan şermezar kenê û şexsê qurbananê qirkerdişan de pêro şehîdanê demokrasî û şorişî bi rêzî yad kenê. Dewletanê wayîrê ferasetê kanwazî û faşîzmî seba ke têkoşînê şaran ê hemparî ra tersenê Qirkerdişê Gazî yê 1995î û Qirkerdişê Qamişloyî yê 2004î kerd. Qirkerdişê Gazî seba ke têkoşînê şorişî yê Kurdîstanî mîyanê têgêrayîşanê sosyalîstan de vila bîyêne û elewîyan serkêşîya şorişî kerdêne ame kerdene. Qirkerdişê Qamişloyî de zî wayûbiratîya kurd û ereban ameye hedefkerdene.

Her çiqas bi nê qirkerdişan wayûbiratîya şaran amebî hedefkerdene zî no armanc ser nêkewt. Têkoşînê şaran ê hemparî vera faşîzm, kanwazî û ferasetê yewperestî erjê xo afernayî û nê xîretî pûç kerdî. Hem paştdayîşê şaranê Tirkîya hem zî Şorişê Rojawanî û sîstemê Rojawanî yo demokratîk netîceyê ney ê. Nê qewimîyayîşê tarîxîyî heman wextî de vera qirkerdişan cewabê tewr raşt ê.

Labelê heyf ke feraseto qirker hema nêqedîya. Bi qirkerdişanê neweyan no feraset xiret keno ke kanwazî, tarîtî û xirabîye dewam bikerê. Nê wextî de ke ma qurbananê nê qirkerdişan yad kenê qirkerdişê neweyî yenê kerdene. Nika Sûrîye de elewîyî yenê qirkerdene. Ma ancî teda û qirkerdişê vera elewîyan şermezar kenê. Bêguman têkoşînê şaran o hempar do aver şoro û kanwazî, yewperestî û faşîzmî birijno.’’