Hemserekîya Konseya Rayberdişî ya KCKyî semedê tewrbîyayîşê rayraşîyayîşê Kolnî yo ke do semedê azadîya fîzîkîye ya Rayberê Şarê Kurdî Abdullah Ocalanî 17ê sibate de bêro kerdene, veng da. KCKyî vat: ''Şarê ma yo ke Ewropa de ciwîyeno ganî hewtî ra heta hewteyî tewrê mîtîngê pîlî yê Kolnî bibo.''

Eşkerayîya KCKyî de nê ameyî parekerdene:

''Serkêşîya şarê kurdî û dostanê înan de 10ê teşrîna verên a 2023yî de bi şîarê 'Rayber Apoyî rê azadîye, meseleya kurdan rê çareserîya sîyasîye' kampanyaya hîra ameye destpêkerdene. Na gama tarîxîya ke serrgêra komployê mîyanneteweyîyî de ameye eştene netîceyê ci zî tarîxîyî yê.

Kampanyaya Azadîye têna semedê şarê kurdî nê semedê heme merdimîye netîceyê bimana afirnayî. Şarê kurdî destpêkerdişê komployê mîyannetweyîyî ra nata keno ke vengê xo bido eşnawitene. Kampanyaya Azadîye no waştişê şarê ma ard ca. Reyna paradîgmaya Rayber Apoyî fîkrê cîyayî zî ardê têhet. Nê wird netîceyî mojnenê ke na kampanya senî tarîxî ya. Nê hetî ra Kampanyaya Azadîye semedê heme merdimîye bîye afirnayîşê şefeqêkî. Heme kesê ke keda ci na kampanya de est a ma înan pîroz kenê.

Bêşik no serkewtiş verî serkewtişê şarê welatperwerî yê Kurdîstanî yo. Şarê kurdî bi heskerdişê xo yê Rayber Apoyî û têkoşînê xo hêvîya merdimîye pîlêr kerd û têkoşînê seyyewbînîye, azadîye û demokrasîyî xurtêr kerd. Aye ro ma şarê kurdî welatperwerî yê Kurdîstanî cîya pîroz kenê.

Proseso ke me tede yo prosesêko tarîxî yo. Kampanyaya Azadîye de nê prosesî de têkoşînê demokrasîyî xurtêr kerd û yewîye û paştdayîşê hêzanê modernîteya demokratîke zafêr kerd. Her hetê dinya ra merdimî bi waştişê cuyeyêka newî û dinyayêka azade na kampanya de ameyî têhet. Ma nê sey averşîyayîşêkê muhîm û tarîxî vînenî. Ma pê bawer ê ke her kes wina vîneno û erjneno.

Nika wextê ci yo ke nê prosesê tarîxîyî ma bikirişê merhaleyêka newî, bineyna berze bikerê. Şarê ma û dostanê ci bi mîtîngê pîlî yê Kolnî qerarîya xo monaye. Bi na kampanya azadîya fîzîkîye ya Rayber Apoyî çareserkerdişê meseleya kurdan kirişîya rojdemî. Bi çalakîyanê ke heta nika ameyî kerdene no waştiş ame ca.

Nika bi mîtîngê Kolnî  ma kewnê mehaleyêka nêwî. Coka zaf muhîm o ke mîtîngê Kolnî senî ke ameyo plankerdene wina ravîyero.  Ma veng danê heme şarê xo û dostanê ci yê ke Ewropa de ciwîyenê wa tewrê nê mîtîngî bibê. 17ê sibate de wa şarê ma hewtî ra heta hewtayî tewrê mîtîngê pîlî yê Kolnî bibo û heskerdişê xo yê Rayber Apoyî û welatperwerîya xo ramojno.''