Hemserekîya Konseya Rayberdişî ya KCKyî Şêx Seîd û embazê ci yê ke 29ê hezîrana 1925î de hetê dewleta tirke ra ameyî îdamkerdene, yad kerdî.

Hemserekîye Şêx Seîd û embazê ci bi hurmetî yad kerdî, şexsê înan de heme şehîdê Kurdîstanî yad kerdî, sozo ke dayo şehîdan nêwe kerd û nê vatî:

''Şêx Seîd û embazê ci yê dewa netîceya zîhnîyetê înkarê kurdan de ameyî îdamkerdene. Bado ke komere ameye ronayene cade estbîyayîşê şarê kurdî ame înkarkerdene. Sozê ke dîyayî kurdan nêameyî tepiştene, şarê kurdî heqanê xo yê demokratîkan ê neteweyî ra mehrum ame verdayene, bêhuqûq ame verdayene.

Şarê kurdî vera nê înkar û bêhuqûqîye vejîya. Şêx Seîd û embazanê ci vervejîyayîşê şarê kurdî rê serkêşîye kerde, vera înkar û neheqîye têkoşîn kerd. Nê hetî ra têkoşîno ke hetê Şêx Seîdî ra ame averberdene, meşrû û demokratîk o, tarîxê Kurdîstanî de wayîrê cayê muhîmî yo. Vera înkar, îmha û qirkerdişî tewirê şarê kurdî mojneno ra. No proses muhîm o, çunke hem têkoşîn, tewirê azadîye  yê şarê kurdî yê vera înkarî  fîneno meydan hem zî nêzdîbîyayîşê dewleta tirke yê vera kurdan nê prosesî de vejîya werte. Zîhnîyet û sîyasetê qirkerdişê kurdan wextê fatisnayîşê têkoşînê Sêx Seîdî û îdamkerdişê rayberanê ci de dest pêkerd û no proses heta roja ma ame.

Dewlete bi qirkerdiş û îdaman waşt verê serewedaritişê şarê kurdî bîgêro, bi nê Kurdîstan de prosesê neweyî yê qirkerdişî dest pêkerd. Nê tarîxî ra dima Kurdîstan de prosesê qirkerdişan dest pêkerd. Sere de Agirî, Dêrsim û Zîlan de her cayê welatî de qirkerdişî qewimîyayî. Coka Rayber Apo nê tarîxî sey destpêkerdişê qirkerdişê kurdan geno dest. Qanûn û mekanîzmayê qirkerdişî yê verênî nê prosesî de kewtî dewre. Dima ra sey Planê Şark Islahatî bîyî fermî.  Rîyo raşt ê Tirkîya Planê Şark Islahatî yo. Qanûn û mekanîzmayê ke pêre vejîyayî ê zî nê rê xizmet kenê.

Tirkîya de têna yew qanûn yeno caardene o zî qirkerdişê kurdan o. Çi heyf ke seserrî zî ravîyarî zîhnîyeto qirker ê dewleta tirke nêbedilîya. No zîhnîyet ewro hetê îqtîdarê AKP-MHPyî ra yeno rayraberdene. La xoverdayîşo tew gird ê tarîxê kurdan nêverdeno îqtîdaro faşît planê qirkerdişî bîyaro ca. Şarê kurdî qesasê Şêx Sêîdan, Seyîd Rizayan, Qazî Mihemmedan girewt. Bêşik îqtîdaro faşîst hema zî semedê qirkerdişî hêrişî keno la têkoşîno topyekun ê kurdan o teşhîr kerd, hinî nêeşkeno payra bimano.

Şarê ma, şarî, kedkar û karkerî, cinî û hêzê demokratîkî eşkenê bi têkoşînê yewbîyayeyî verê nê îqtîdarê îşxalker, qirker, xespkerdî bigêrê û rayîrê Kurdîstanê Azadî û Turkîyeya Demokratîke abikerê. Ma reyna Şêx Seîd û embazanê ci yad kenê ke û veng danê ke wa vera Îqtîdarî têkoşîn bêro xurtkerdene.''