Hemserekîya Konseya Rayberdişî ya KCKyî bi wesîleya serra newî eşkerayîye daye. KCKyî mesajê xo de serra newî pîroz kerde û vat wa na serre bibo serra azadîya şaranê bindestan, cinîyan û merdimîye.

Eşkerayîya KCKyî de nê ameyî parekerdene:

''Ma serra 2022yî ya ke tede têkoşînê girdî ameyî dayene, xo dima verdenê û kewnê serrêka newî. Serra 2022yî de Şerê Dinya yê Hirêyînî ame xurtêr bi. Pîya bi şerê Ukrayna reya verêne vejîya teberê Rojhelatê Mîyanênî û wina qeyde warê şerî dahîna bi hîra. Xora no şer sere ra heme şar û xoza hedef keno. Modernîteya kapîtalîste ke komel û xoza îmha kena wazena bi çînkerdişê ercanê komelî xo bido ciwîyayene.  Serra 2022yî sîstemê modernîteya kapîtalîstî rijnayîşê xo yê vera komel û xoza zêdîna. Vera nê têkoşîno xurt ame dayene.  

Bêşik serra 2022yî de tewr zaf têkoşînê cinîyan vejîya vernî. Cinîyan vera zîhnîyetê serdestî yê camêrdan têkoşînê xo xurtêr kerd. Rojhelatê Kurdîstanî de û Îran de cinîyan sekêşîya têkoşînî kerd û slogana Jin, jîyan, azadî heme dinya de ame vatene û vila bîye. Eşkera esene ke ameyox de do serkeşîya têkoşînê cinîyan de komel û xoza rijnayîşî ra bêrê xelisnayene û cuye bibo azad.

Serra 2022yî de tewr zaf kurdî raştê hêrişê îşxal û qirkerdişî ameyî û vera nê hêrişan têkoşîno gird kerd, bedelê giranî dayî. Dewleta tirke ya ke pê zîhnîyetê dişmenîya vera kurdan têgêrena vera Vakur, Başûr, Rojawan, Mexmûr, Şingal û Herêmanê Pawitişî yê Medya û her cayo ke tede kurdî ciwîyenê hêrişê şerê taybetî û operasyonê qirkerdişê sîyasîyî zêdînayî.

Paris de qirkerdişê diyînî ame kerdene.  Sey qirkerdişê verênî no qirkerdiş zî hetê îqtîdarê AKP-MHPyî ra ame kerdene. Şarê kurdî vera nê heme hêrişan tim bêmabên têkoşîn keno. Serra 2022yî wina pê têkoşînî ravêrt. Bêşik têkoşîno tewr pîl hetê Gerîlayanê Azadîye yê Kurdîstanî ra ame dayene. Têkoşînê gerîlayan planê îşxal û îmhayî yê îşxlakeran betal kerdî. Serra 2022yî de dewleta tirke binkewt û şarê kurdî serkewt.

Eşkera yo ke serra 2023yî de sey hêzanê azadîye û demokrasî zafêr wezîfeyî ma pawenê. Seba ke ma wayîrê wezîfeyanê xo yê tarîxîyan bivejîyê ma do têkoşînê xo bi hewayêkê qerardarî rayra berê. Na çarçewe de ma veng danê heme hezanê demokrasî yê dinya ke ma pê perspektîfê modernîteya demokratîke têkoşînî xurtêr bikerê.''