Komîteya Şar û Bawerîyan a KCKyî bi mesajêkî Roşanê Noelî yê şaranê xirîstîyanan ê kurdîstanijan û alemê xirîstîyanan fîraz kerd û nê vatî:

''Ma Roşanê Noelî yê şaranê xirîstîyanan ê kurdîstanijan û pêro alemê xirîstîyanan fîraz kenê. Çend rojan ra dima dinya do derbazê serrêka newîye ya miladî biba. Bi na wesîle ma serra newîye ya miladî zî fîraz kenê. Ma hêvî kenê ke serra newîye pêro şaran rê haştîye, edalet û têdûştîye bîyara, bi têkoşînê demokrasî û azadîye derbaz biba. Ma vanê ke Roşanê Noelî yê 2023yî bikerê serrêka çareserîya meseleyanê bingeyînan.

Hêzanê modernîteya kapîtalîste 2022 de gef û hêrişanê xo rê dewam kerd. Şaran zî cigêrayîş û têkoşînê xo yê seba çareserîya meseleyanê ekolojîk, sîyasî û komelkîyan pîl kerdî.

2022 de bi bêvengîya vera hêrişanê kîmyewîyan ê dewleta tirke wijdan, exlaq û huqûq reyna ameyî çinkerdene. Dewleta tirke ya faşîste seba çinkerdişê şaranê Rojawanê Kurdîstanî hêrişê xo zêdînayî. Sîstemê tecrîdî yê Îmraliyî reyna mojna ke dewleta tirke qet yew krîterê exlaq û huqûqî nêşinasnena. CPT û Yewîya Ewropa paştî daye hêrişanê qirkeran û tecrîdî.  

Rewşêka winayêne de fîrazkerdişê roşanan, vîrardişê fîrazîyanê komelî û çareserkerdişê meseleyanê merdimatîye do hîna manadar bibê. Sey têgêrayîşî ma pê bawer ê ke meseleyê komelkî, sîyasî û ekonomîkî bi têkoşînê demokrasî û azadîye eşkenê bêrê çareserkerdene. Bi na bawerîye ma hêvîdar ê ke Roşanê Noelî û serra newîye do bibê wesîleya cuyêka ekolojîke, demokratîke û azade. Ma venga şaran danê ke 2023 de vera dewlete û hukmatanê faşîst, qirker, kolonyalîstan ê Kurdîstanî û her cayê dinya de têkoşînî xurtêr bikerê. Serra newîye de şarî wa hîna zaf paştî bidê yewbînan.

Bi nê hîs û fikran ma Roşanê Noelî reyna şaranê asûrî, sûryanî, keldanî û armenîyanê Kurdîstanî rê û pêro xirîstîyanan rê fîraz kenê û hêvî kenê ke Noel do bibo serrêke ke cewab bido hêvî û pawitişê şaran.''