Keskîne 15 serrî yo vera keyeyo ke ame qetilkerdene gefî estê

Hemsereka Pêroyî ya ÎHDyî Erene Keskîn pare kerd ke 4 rojî verî înan keyeyê Dedeogullariyî reyde qisey kerdo û vat: ''Keyeyî vatbi ke 15 serrî yo înan rê gefî yenê wendene.''

Qezaya Meramî ya Konya de 7 ferdê keyeyê Dedeogullariyî ameybî qetilkerdene. Mengêke verî keye maruzê hêrişê nîjadperestî zî mendbi. Keyeyî pare kerdbi ke asayîşê ganê înan çin o û vera tehlukeyî qet yew tedbîr nêgêrayî.  Qirkerdişî ra dima wexto ke polîsî ameybî cayê hêrişî qerebalixî ra kesêkî zî vatbi ''Tîya de do kurdêk zî nêmano.''

Hemsereka Pêroyî ya ÎHDyî Erene Keskîn îfade kerd ke 4 rojî verî înan keyeyê Dedeogullariyî reyde qisey kerdo. Keskîne ANFyî rê qisey kerd û vat: ''Komîsyonê vera Nîjadperestîye û Cîyakerîye yê ÎHDyî yê Îstanbulî keyeyê Dedeogullariyî û avûkatanê înan reyde qisey kerdbi. 4 rojî verî wexto mi înan reyde qisey kerd înan vat ke ê zaf tersenê û maruzê gefan manenê. Keyeyî dabi zanayene ke 15 serrî yo vera înan gef yeno werdene û qirkerdişî ra verî kesê destbendkerdeyî vera dîyayê. Keyeyî xora verî zî eşkera kerdbi ke vera înan hêriş ameyo kerdene. Selahîyetdarê dewlete ganî cade vera merdimanê sûcdaran tedbîran bigêrê.''