Hemsereka Komeleya Heqanê Merdiman (ÎHD) Erene Keskîn hêrişê vera govenda kurdan û esterîyayîşê nuşteyanê bi kurdkî de ANFyî rê qisey kerd.

Erene pare kerd ke tepişîyayîşê bi sebebê govende, esterîyayîşê nuşteyanê bi kurdkî mojnenê ke ferasetê 90an îqtîdar de yo. Erene vat: ''Komara Tirkîya dewletêka winayên a ke morê xo dayo binê xeylêk peymananê mîyanneteweyîyan la nika pêroyê nînan binpay kena. Tepişîyayîşê bi gêrayîşê govende zî îsbatê ney o.''

Erene vist  vîrî ke goreyê biranê Mehkemeya Berze û Mehkemeya Heqanê Merdiman a Ewropa (MHME) sloganê 'Bijî Serok Apo' sûc nîyo û vat: ''Sêrt de veyveyêk de bi îdîaya ke govenda gerîlayan yena girewtene domanî tepişîyayî. Sosyolojîyêka na cografya est a. Veyveyan de qoricîyî zî bi na deyîre govende gênê. Na deyîre hetê şarî ra ameya qebulkerdene. Tîya de kurdbîyayîş yeno cezakerdene. Ê kurdan rê vanê 'Şima do sey kurdan nêciwîyê.' 

Nê kerdişê keyfîyî mojnenê ke vera kurdan tehlukeyêko pîl est o. Verê cû kurdî kişîyayêne. Nika her hela kurdan yena kontrolkerdene.  Kurdan, rêxistinanê heqanê merdiman û huqûqî ra ber çewî vera na rewşe vengê xo nêkerd. Merdimî govendgirewtişî ra tepişîyenê Bi her hawayî heqê ciwîyayîşî yeno binpaykerdene. Seke mi vat xîret kenê ke kurdbîyayîşî û heqê kurdan qedexe bikerê.''

Erene Keskîn îfade kerd ke dişmenîya vera kurdan resaya a aste ke hişyarîyê kurdkî yê trafîkî zî esterîyenê û vat: ''Şaredarîyî seba ke verê qezayan bigêrê nê hişyarîyan rayîran ser ra nusenê. Çunke merdimê ke tirkî nêzanenê est ê. Bi esterîyayîşê nê nuşteyan mesajê 'Şima bimirê zî eynê ma de nîyo' dîyeno. Ez vana qey na kerdene de tesîrê MHPyî zaf pîl o. Çunke MHPyî bi temamî kontrol visto destê xo. AKP hinî bîyo MHP. MHP îqtîdar de yo. Şarê kurdî vera nê kerdişan pozîsyonêkê raştî gêno.''