Domano qij ê Rojava Kurdistanî Alan Kurdî yo ke Deryayê Sipî de xeneqîya û leşa ey kobanê Bodrumî de ameye dîyene, bibi sembolê des hezaran bextwaştoxanê ke  Êlûle 2015’î de verê xo dayîbî Ewropa. Trajedîyê bextwaştoxan demêko derg bi resimê Alan Kurdî yê 3 serrî ameybi vatene.

Serran ra pey, nafa zî keştîya ke nameyê ci 'Alan Kurdî' yo Deryayê Sipî de hetkarîya bextwaştoxan do bikera. Sazgehê hetkarîye bi nameyê Sea-Eye yo ke bajarê Regensbûrgî yê Almanya de yo, nameyê keştîya xo ya bi nameyê "Professor Albrecht Penck" vurna û kerd "Alan Kurdî".

Selahîyetdarê Sea-Eye Gorden Îsler serê vurnayîşê nameyî de eşkerayêk daye û vat: “Bi vurnayîşê nameyê keştîye ma waşt bala biancîme serê rastîya meseleya pêlê bextwaştoxan a ke eslê ci de bingeyê xo merdim o. Deryayê Sipî de merdimê ke xeneqîyayê û dejê merdimanê înan o ke nêqedîyeno esto."

Pîyê Alan Kurdî Abdullah Kurdî zî ard ziwan ke, ê keyfweş bîyê ke keştîya ke Deryayê Sipî de bextwaştoxanê xelesnena bi nameyê "Alan Kurdî" wezîfe kena û wina va:’’Dêjê ke ma dîyî, bi hezaran dayîke, pî û keyeyan dîyo. Ganî nameyê Alan Kurdî nêro vîrakerdene.’’

Merasîmê namedayîşî do lîmanê Palma de Mallorca yê Spanyayî de bêro kerdene û pîyê Alan Kurdî Abdullah Kurdî zî do tewrê ci bibo. Keyeyê Kurdî yo ke Kobanîyij o Êlule 2015’î  de bi bote verê xo dabi girawa Kosî ya Yunanîstanî. Labêlê bote vera pêlanê deryayî de demêko kilm de serûbin bîbî û  Alan Kurdî reyde birayê ey Galîp, maya ey Rehane û 9 koçberanê bînan deryayî de cuya xo vîndî kerdibi.