Bi desan aktîvîstê ke 7ê teşrîna peyêne de Amerîkaya Latîne ra heta Îspanya, Fransa ra heta Îtalya  xeylêk welatanê cîya cîyayan paytextê Yunanistanî Atina de ameyî têhet semedê azadîya Rayberê Şarê Kurdî Abdullah Ocalanî çalakîya 'Keştîya Azadîye' daye destpêkerdene.

Çarçewa çalakîye de aktîvîstan vizêr tewrê bi xeylêk partîyanê sîyasîyan û rêxitinanê komelê sîvîllî pêvînayîşî kerdî. Pêvînayîşan de rewşa Abdullah Ocalanî û hêrişê dewleta tirke yê vera Kurdîstanî gerîyayî dest.  Saetanê şanî de zî Kampa Multecîyan a Lavrioyî de aktîvîteyê kulturkî ameyî kerdene. Xeylêk aktîvîstî şewe kampe de mendî. Ewro bi seyan kesan aktîvîstê 'Keştîya Azadîye' bi rayraşîyayîşêkî kerdî rayîr. Rayraşîyayîş Lîmanê Lavrîoyî de qedîya.

Tîya bi nameyê aktîvîstan Besîme Konca, Josef Karl Heinrich Savary û Elefteria Psihlogiou qisey kerd. Qiseykerdişan de bale ameye antene tecrîdê 23 serran ê vera Abdullah Ocalanî ser û ame vatene ke seba ke no tecrîd bêro qedînayene na çalakîye hetê Înîsîyatîfê Abdullah Ocalanî rê Azadîye ra ameye destpêkerdene. Qiseykerdoxan bale ante hêrişanê dewleta tirke yê vera kurdan û ser ke bitaybetî menganê peyênen da çeka kîmyewîye yena şuxulnayene û vat ganî tecrîd bêro wedaritene, hêrişê îşxalî bêrê veindarnayene û PKK lîsteya terorî bêro vetene. Badê qiseykerdişan aktîvîstî niştê keştîya ke pê porsteranê Abdullah Ocalanî xemilîyaye. Keştî  12ê teşrîna peyêne de do bireso Napolî.