Aktîvîstê 'Keştîya Azadîye' 9ê teşrîna peyêne de herêma Lavrioyî ya paytextê Atina Yunanîstanî ra kewtî rayîr. Keştîye ewro serrgêra 23. ya ameyîşê Îtalya yê Rayberê Şarê Kurdî Abdullah Ocalanî de do biresa şaristanê Napoli.

Keştîye de qasê 40 aktîvîst, sîyasetmedar, temsîlkarê komelê sivîlî, rojnamegerî, nuştoxî û roşnvîrî estê. Girseyêko pîl Napoli de do keştîye pêşwazî bikero.

Bi na çalakîye azadîya Rayberê Şarê Kurdî Abdullah Ocalanî yena waştene, projeyê Konfederalîzmê Demokratîkî yê Ocalanî dîyeno şinasnayene û têkoşînê kurdan bêro pîlkerdene.

Napoli de bernameyêko hîra esto. Keştîya Azadîye 12ê teşrîna peyêne de nêmroje warê Pisacane yê Napoli de do bêra pêşwazîkerdene. Wina pawîyeno ke aktîvîstî verî eşkerayîya çapemenî bidê.

Saete 16:00 de Modernissimo Sînema ya  Cisterna dell'Olio de konferansêk do bêro dayene. Saete 21:00 de Ex Asilo Filangieri (vico Maffei) de konferansêk do bêro dayene. Aktîvîstê keştîye Yelda Abbasî, Fatemeh Esmaelian Zare, Ferqîn Azad, her wiha Ciccio Merolla, Carmine d'Aniello, 'E Zezi, Davide della Monica û Suonno d'Ajere tîya de do vejîyê sehne ser.