'Keştîya Azadîye' 9ê teşrîna peyêne de herêma Lavrioyî ya paytextê Atina Yunanîstanî ra kewtî rayîr, ewro serrgêra 23. ya ameyîşê Îtalya yê Rayberê Şarê Kurdî Abdullah Ocalanî de resaye şaristanê Napoli yê Îtalya.

Keştîya ke welatanê cîya cîyayan ra bi desan aktîvîstî tede ye hetê bi seyan kesan ra ameye pêşwazîkerdene. Lîmanê Napolî de eşkerayîya çapemenîye ameye dayene. Eşkerayîya kurdkî hetê Yuksel Koçî ra ameye wendene.

Koçî bi nameyê Înîsîyatîfê Ocalanî rê Azadîye yê ke çalakîye organîze kerde, rojnamegerî, çalakwanî û kurdîstanijî selam kerdî û vat: ''Serrgêra 23. yê Komployê Mîyanneteweyî de 12ê teşrîna peyêne ya 1998î roja  ke Rayber Apo resa Îtalya, ma zî ewro resayî tîya. Rixmê şertanê xiraban ê hewayî raywanîyêka tarîxîye ameye kerdene.  Ma eşkenê naye vaje ke pê komployî ame waşatene ke felsefe û têkoşînê Rayber Apoyî bêrê tesfîyekerdene la ewro  felsefeya ey warê mîyanneteweyî de vila beno.

Ma tîya ra Şaredarîya Napolî û şaredarîyanê bînan Îtalya yê ke hemwelatîya rûmete daye Rayber Apoyî înan selam kenê. Ma  bi vengê berzî qirêne û vanê ke wextê ci yo. Wextê azadîya Rayber Apoyî ameyo. Azadîya Rayber Apoyî verê qirkerdişanê Kurdîstanî gena û demokrasî ana Tirkîya. Ma sey çalakwanan azadîya fîzîkîye ya Rayber Apoyî wazenê û veng danê ke wa şiro Tirkîya ser ke vera gerîlayanê azadîye çekanê kîmyewîyan nêşuxulno. Reyna waştişê ma yo muhîm zî oyo ke wa PKK lîsteya terorî bêro vetene.  PKKyî vera DAÎŞî şer kerd û dinya nê belayî ra xelisnaye. Na çalakîya ma tîya qedîyena la têkoşînê ma do bi aktîvîteyanê cîya cîyayan dewam bikero.''

Badê eşkerayîye ver bi banê walîtîye rayraşîyayîşêk ame kerdene û  bale ameye antene rewşa Rayberê Şarê Kurdî Abdullah Ocalanî ser.  Vêrê bane walîtîye de mîtîngêk ame kerdene. Tîya Nursele Aydogan qisey kerd. Aydoganê vist vîrî ke Abdullah Ocalan semedê azadîya şarê kurdî Îmrali de bedel dano û vat: ''Îtîfaqê ma dewletî ney şar ê. Eke paştdayîşê şaran bibo pîl rayîrê azadîya birêz Ocalanî do muheqeq bêro akerdene.''