Beşdaranê 'Rayraşîyayîşê Azadîye yê Pîlî' ra Wekîla DEM Partî ya Dêrsimî Aytene Kordu vat: ''Ma hem seba azadîya xo hem zî seba azadîya Birêz Ocalanî nê têkoşînî kenê. Key tecrîd biqedîyo çareserîya demokratîke zî do dest pêbikera.''
Beşdaranê 'Rayraşîyayîşê Azadîye yê Pîlî' ra Wekîla DEM Partî ya Dêrsimî Aytene Kordu derheqê çalakîya înan de ANFyî rê qisey kerd.
Aytene Kordu îfade kerd ke ê her ca de bi coşî hetê şarî ra yenê pêşwazîkerdene û vat: ''Ma şarî ra moralêko pîl girewt. Seke zanîyeno tepişteyî grevê vêşanîye de yê û keye û merdimê tepişteyan de Nobeta Edaletî de yê. Seba azadîya Birêz Abdullah Ocalanî qerardarîyêka pîle est a. No rayraşîyayîş beşêkê na qerardarî yo. Bi taybetî cinî û dadîyî bi kelecanêkê pîlî ma pêşwazî kenê.''
Aytene Kordu pare kerd ke cinîyî serkêşîya rayraşîyayîşî kenê û vat: ''Tecrîdê vera Birêz Ocalanî yeno manaya tecrîdkerdişê şaran. Ma hem seba azadîya xo hem zî seba azadîya Birêz Ocalanî nê têkoşînî kenê. Key tecrîd biqedîyo çareserîya demokratîke zî do dest pêbikera. Coka ganî cade Birêz Ocalan azad bibo.''
Aytene Kordu ard ziwan ke ganî masaya dîyalogî newe ra bêra ronayene û vat: ''Ma hol zanenê ke bi dîyalogan ma eşkenê pêro meseleyan çareser bikerê. Hem seba azadîya xo, hem seba azadîya Birêz Ocalanî hem zî seba azadîya şaranê Tirkîya û Kurdîstanî ma do heta peynî Rayraşîyayîşê Azadîye yê Pîlî bikerê. Ma do qetî ser bikewê. Ma bi nê moral û hêzî têgêrenê.''
