17ê temmuza 2019î de şaristanê Hewlêrî yê Başûrê Kurdîstanî de îdarekarê MÎTî Osman Kose amebi kuştene. Derheqê serebûtî de seba Mazlûm Da û Abdurrahman Erî cezaya îdamî dîyaye. Keyeyanê Abdurrahman Er û Mazlûm Dagî Serekê Herêma Kurdîstanî Nêçirvan Barzanî rê meltubêk erşawit.

Mektub wina yo: 

“Sereko birêzİ

17ê temmuza 2019î de paytextê Herêma Başûrê Kurdîstanî Hewlêr de serebûtêk qewimîya. Dima birazîyê mi Abdurrahman Er zî tede çend ciwanê kurdî ameyî tepiştene. Abdurrahman Er û Mazlûm Dagî rê 11ê sibata 2020î de cezaya îdamî dîyaye.

22ê êlula 2020î de Iraq de îdareyê Mehkemeya Cezaya Berze ya Herêma Başûrî na ceza tesdîq kerde. Nika zî seba îdamî bira cenabê to lazim a.

Sereko birêz, seke cenabê to zî zaneno cezaya îdamî welatanê demokratîkan de wedarîyaye. Seba ke na ceza hema zî Kurdîstan de esta û vera keyeyanê ma yena caardene ma zaf qerqilîyene. Ma wina yew keye yê ke dewaya Kurdîstanî de bedelê pîlî dayî. Ma seba ke nê wird ciwanan rê cezaya winasêne dîyaye zaf xemgîn ê.

Nê wird ciwanî maruzê wahşetê dewleta tirke bîyî û mîyanê tedaya ci de bîyî pîl. Nê ciwanan vera kerdişanê dewleta tirke sere wedarit, nê serebûtî de hedefê înan selahîyetdarê MÎTî bîyî. Nê ciwanî na ceza heq nêkenê. Goreyê ma zî no serebûtê mergî raşt nîyo la seba ke Mehkemeya Başûrê Kurdîstanî cezaya winasêne daye ma pê şaş bîyî.

Nê ciwanî goreyê rayaumûmîya Kurdîstanî ciwanê welaterwer ê. Edîlane nîyo ke Mehkemeya Kurdîstanî na ceza daye înan û na ceza hetê ma ra zî nêna qebulkerdene. 

Nika tesdîqkerdiş yan zî redkerdişê na ceza selahîyetê cenabê to de yo. Ma venga cenabê to danê ke na ceza tesdîq mekere. Eke şima na bire tesdîq bikere zerarêko pîl do bireso yewîya kurdan ser. Ma pê bawer ê ke ti do na ceza tesdîq nêkere.

Bi desan dezgeh û rêxistinanê komelê sivîlî paştî da nê waştişê ma û ma reyde têkilîye naye ro. Nê dezgeh û rêxistinî wazenê ke cezaya îdamî pêro dewletan de bi taybetî Herêma Kurdîstanî de bêra wedaritene.

Ma bi nê hîsan cenabê to ra pawenê ke cezaya îdamî ya nê wird ciwanan tesdîq mekere û bimojne ke kurdî vera cezaya îdamî de yê.''