Emîne Şenyaşara ke mêrde û di lajê ci hetê merdimanê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde roja 70. de nobeta edaletî rê dewam kena. Şenyaşaran semedê qedexeyê tebervejîyayîşî 30ê nîsane ra nata keye de çalakîya xo kerdêne. Keye ewro reya verê Edlîyeya Riha de çalakîya xo ano ca.

Ferît Şenyaşaro ke hêrişî ra sey birîndar xelisîya vat: ''Ma reyna waştişê xo dibare kenê: Nêweşxaneyê Dewlete yê Pirsûsî de qirkerdişêk ame kerdene. 3 ferdê keyeyê ma ameyî qetilkerdene. Dosya Serdozgerîya Komare ya Riha de ya û derheqê qirkerdişî de tehqîqatêk nêame kerdene. Ma edaletî wazenê. Ma do çalakîya xo war nêverdê. Kesê ke wazenê paştî bidê ma wa bêrê tîya. ''

Emîne Şenyaşar zî vat: ''Ma reyna verê bînaya edlîye de yê. Heta ke qeydê nêweşxaneyî nêrê eşkerakerdene ma tîya ra nêşorê. Çira dozger qeydan nêvejeno werte? Lajê min o bêsûc 3 serrî yo hucreyê zîndanî de tepişîyeno. Kiştoxê qijanê mi hê serbest gêrenê. Ma têna edlet wazenê.''

Wexto ke keyeyî çapemenîye rê qisey kerdêne polîsan bêbahane keye baxçeyê edlîye ra vet. Keye verê blokanê betonan ê edlîye de çalakîya xo rê dewam keno. 

Keyeyî hesabê xo yê twitterî de zî wina vat: ''Verê Edlîyeya Riha de têkoşînê ma yê edaletî dewam keno. Heta ke dozger derheqê 23 kesan de ke tewrê qirkerdişê nêweşxaneyî bîyî tehqîqat nêdo destpêkerdene ma çalakîya xo rê dewam kenê. Ma mexdûrê qirkerdişî yê. Ma têna edalet wazenê.''