Wendekara Zanîngehê Munzurî Gulîstane Doku Dêrsim de 5ê çeleyê 2020î ameyî vînîkerdene û a roje ra nata tira xebere çîn a. Keyeyê Gulîstane Doku Komeleya Heqanê Merdiman a  Anqara de eşkerayîya çapemenîye daye.

Hemsereka ÎHDyî ya Anqara Sevîle Turguta ke eşekrayîye de qisey kerd vist vîrî ke Gulîstane Doku di serrî yo vînîbîyaye ya û vat keyeyê ci hîrê rojî yo kuçeyanê Anqara de raştê şîdetî yeno.

Waya Gulîstane Doku Aygul Doku zî ard ziwan ke di serrî yo wazenê Wezîrîya Edaletî dir pêvînayîş bikerê la nêeşkenê biresê înan, heme muracatê înan yenê redkerdene. Doku vat seba ke înan waşt  şirê Wezîrîya Edaletî raştê şîdetî ameyî û hetê polîsan ra ameyî derbkerdene.

Dayîke Bedrîye Doku vat: ''Gama ke  ma waşt şirê Wezîrîya Edaletî çar polîsanê cinîyan hêrişê mi kerd. Destê mi bîyî mor. Eke şikkerde Zaynal Abarakov bêro destbendkerdene do cadê Gulîstane bêro vînayene. Abarakov xora vano paştê ey pêt a. Ez nêzana kam peyê paşta ci de yo. Ez veng dana heme sîyasetmedaran, ma tarî de tarî de meverdê. Ma heme partîyan dir pêvînayîş kerd têna AKP mend.  Ez tîya ra veng dana înan. Wa meclîs de komîsyon bêro ronayene û kênaya mi bêro vînayene. Esteyanê kênaya mi bidê mi, ez ci ê duayêke biwanî.''