Wendekara Zanîngehê Munzurî Gulîstane Doku 5ê çeleyê 2020î ra nata vînîbîyaye ya. Keyeyê Doku ya ke tira xebere nîna girewtene verê Edlîyeya Dêrsimî de dest pê çalakîya roniştişî kerd.

Keyeyê Gulîstane Doku yo ke Amed de ciwîyeno verê serrgêra vînîbîyayîşê kênaya xo de ame Dêrsim. Babî Halît Doku, dayîke Bedrîye Doku û waye  Aygul Doku verê Edlîyeya Dêrsimî de semedê persayîşê aqibetê kênaya xo çalakîya roniştişî daye destpêkerdene. Keyeyê Doku seba ke selahîyetdaran cipersayîşo xurt nêkerdo nêrazibîyayîş ramojna û veng da Wezîrîya Edaletî. Keyeyê Doku vat: ''Eke Gulîstane ciwîyena bîyarê, eke ameya kiştene zî esteyanê ci bidê.'' Keyeyî waşt wa verguman Zainal Abarakov bêro muhakemekerdene.

Platformê Demokrasî û Kede yê Dêrsimî zî paştî daye keyeyê Gulîstane Doku.