Tepişteyo nêweş Vefa Kartal 30ê gulana 2020î de Zîndanê Edîrne de merd. Keyeyê Kartalî da zanayene ke prosesê vîrusê Korona de seba veradayîşê Vefa Kartalî înan 23 reyî muracatê Wezaretê Edaletî kerd.
Rewşa tepişteyan ê nêweşan xemê dewlete nîya coka her roje tepişteyî mirenê. 30ê gulana 2020î de zî Vefa Kartalî Zîndanê Edîrne de dinyaya xo bedilnaye. Keyeyê Kartalî ANFyî reyde qisey kerd.
Keyeyê Kartalî seba cenazaya Vefa Kartalî bero Manîsa Nêweşxaneyê Zanîngehê Trakya ra girewt. Keyeyî îfade kerd ke Vefa Kartal 24 serran ra nata pê zaf nêweşîyan kewtbi û pê zanayîşî lapanê mergî de vera dîya. Keyeyî da zanayene ke prosesê janî de zî înan 23 reyî muracatê Wezaretê Edaletî kerd ke Vefa bêro veradayene la selahîyetdarî pê berpirsîyarîye tênêgêrayî.
Keyeyê Kartalî vist vîrî ke serra 2018î de Kartalî vera binpaykerdişê heqê tedawî Zîndanê Tekîrdagî de 96 rojan rojeyê mergî kerd û dima sewqê Zîndanê Edîrne ame kerdene. La şert û mercê nê zîndanî ê verênî ra giranêr bîyî. Keyeyî pare kerd ke Vefa Kartal verê çimanê merdiman de terkê mergî ame kerdene.
Cenazaya Vefa Kartalî Manîsa de do hetê gorê dadîya ci de bêra definkerdene.
