Zîndanê Kirşehîrî de 14 tepişteyê sîyasîyî vera caardişanê keyfîyan û vera merdimîye bi mengan o ke grevê vêşanîye yê bêdem-bêagêrayîşî kenê.

Tepişteyan 19ê gulane de dest pê grevê vêşanîye kerd û 32 rojan ra dima çalakîya xo vurnaye grevê vêşanîye yê bêdem-bêagêrayîşî.

Tepişteyê ke grevê vêşanîye de yê nê yê: Çetîn Yildiz, Îmam Bûzî, Saîm Ozdemîr, Muhammed Veysel Adim, Cumalî Yildirim, Mujdat Korhan, Firat Altun, Alî Saday, Omer Hayat, Mazlum Donder, Emrah Kina, Omer Bedîr, Feyaz Gulsoy û Mehet Can Yîgîner.

Avûkatê tepişte Çetîn Yildizî Îsmaîl Turanî pare kerd ke muwekîlê ci rê bi îfadeyanê zûran cezaya 9 serran û 9 mengan ameye dayene û gulana 2017î ra nata tepişte yo. Turanî da zanayene ke waştişê heqdarî yê tepişteyan ameyî redkerdene, dest nîyeno mektubanê înan ê seba Wezaretê Edaletî ser.

Kekê Çetîn Yildizî Abdullah Yildizî îfade kerd ke rîyê janî rê pêvînayîşê bi keyeyan ame qedexekerdene. Yildizî vat: ''Xîret kenê ke pêvînayîşê bi telefonî zî qedexe bikerê. Derheqê tepişteyan de zanayîş nêdîyeno ma keyeyan. Ma wazenê seba ke grevê veşanîye biqedê çareserîyêke bêra dîyene.''