2ê temmuza 1993î de 33 roşnvîrî Otêla Madimakî de ameybî vêşnayene. Hemserekê Şubeyê Anqara yê Komeleyanê Elewîyan ê Demokratîkan (DAD) Mustafa Karabudakî derheqê babete de ANFyî reyde qisey kerd.
Mustafa Karabudakî vat: ''Hîşmendîya emewîyan Kerbela ra nata dewam kena. Qirkerdişê Madimak, Dêrsim, Çorum, Melet, Mereş û Gazîyî zî netîceya na hîşmendî ya.  Qirkerdişê Madimakî ra 27 serrî derbaz bîyî labelê têkoşînê ma yo huqûqî ame pûçkerdene. Seba ke raştîye eşkera biba gamêke zî nêameye eştene. Kiştoxê Madimakî Ewropa de bi rehetî gêrenê. Wextê qirkerdişî de hukmatê koalîsyonî estbi û sîyaset xeniqîyabi. Têgêrayîşê Azadîye yê Kurdîstanî de averşîyayîşê girîngî estbî. Karkeran cephe de alaya têkoşîne darde kerbdi û zanîngehan de zî wendekarî vejîyabî meydanan. Qirkerdişê Madimakî seba bêvengkerdişê nê girseyî ame kerdene.

Serebûtê ke Nisêbîn, Cizîr û Sûr de qewimîyayî Qirkerdişê Madimakî ra cîya nîyê. Qirkerdişê vera goran û vera cayanê fîrazan zî beşêkê Qirkerdişê Madimakî yê. Dewlete bi hawayêjê topyekunî hêrişê her kesî kena.

Elewîyî demokrasî û haştî wazenê. Ma wazenê ke hesabê nê qirkerdişan bêro dayene, dosyayî bêrê akerdene, prosesê mehkeme wa dest pêbikero. Wa sûcdarî bêrê cezakerdene. Hetêko mîyanneteweyî yê nê qirkerdişan esto. Ma wazenê nê pêro eşkera bibê.''