'Kitabxaneyê Rayberîye' her roje Ewropa ra gêreno. Kitabxane vizêr Montpellier, Bern û Amsterdam de bi.

Montpellier

Kitabxaneyê Rayberîye Nice, Draguigan, Margnene ra dima resa Montpellier. Aktîvîstan standêk akerde û kitab û broşurî dayî şinasnayene. Kitabxane uca ra ewro şêro Toulouse û Bordeaux.

Bern

Swîsre de kitabxane Solothurn, Zurih û Luzernî ra dima resa şaristanê Bernî. Aktîvîstan standê xo akerd û eşkerayîyêke wende. Aktîvîste Asmîne Engîn derheqê xebatanê înan de ANFyî rê qisey kerd û pare kerd ke ê do çarçewa hemleya azadîye de seba parekerdişê fikranê Rayberê Şarê Kurdî Abdullah Ocalanî têkoşîn û xebatanê xo dewam bikerê.

Amesterdam

Hollanda de Den Haagî ra dima Kitabxaneyê Rayberîye resa Amsterdam. Konvoyêk zî kitabxane teqîb kerd. Tîya de bi çalakîyêke Komployê 15ê Sibate ame protestokerdene. Hemserekê DEM-NEDî Huseyîn Yildizî çalakîye de qisey kerd û bale ante hêrişanê vera Garê ser. Yildizî pare kerd ke rejîmê Erdoganî Garê de leşkerê xo kiştî. Çalakîye de broşorî ameyî vilakerdene.