Kongreya Neteweyî ya Kurdîstanî (KNK) vera gefê DAÎŞî mesajêk weşana û venga dezgehanê mîyanneteweyîyan da.

KNKyî pare kerd ke serrgêra 7. ya xelisnayîşê Kobanê de DAÎŞ newe ra vejîya werte û şaranê Sûrîye rê gefêko pîl wend. KNKyî ard ziwan ke hêrişê vera Zîndanê Sinaa pê paştdayîşê hêzanê teberî ameyo kerdene. KNKyî vat: ''Rejîmê Şamî û dewleta tirke paştî danê DAÎŞî û ci rê hetkarîye kenê. 20ê çeleyî ra nata hêzê QSDyî seba kontrolkerdişê tehlukeyî şer kenê. Xeylêk tepişteynê DAÎŞî nika serbest ê û hucreyê DAÎŞî newe ra aktîf bîyî. Têkoşînê vera DAÎŞî ganî têna milê Îdareyê Xoserî û QSDyî de nêbo. DAÎŞ vera pêro dinya gef o.

Dewletê ke hemwelatîyê xo yê cergê DAÎŞî nêgênê, seke bombayêke verdenê erdê Rojawanî. Têgêrayîşê dewleta tirke Rojawan de gefê DAÎŞî sey rîskî şuxilneno. Her dewleta ke wazena peynîya nê gefî bîyara ganî vera dewleta tirke tewirêkê zelalî bimojna. 

Ma venga Neteweyanê Yewbîyayeyan, NATO, Koalîsyonê Mîyanneteweyî, Yewîya Ewropa, Yewîya Ereban û Afrîka danê ke seba çinkerdişê DAÎŞî ney bikerê:

-Karê agêrayîşê endamanê DAÎŞî asan bikerê û seba muhakemekerdişê înan mehkeme ronê.

-Dewleta tirke hetê sîyasî û dîplomatîkî ra tecrîd bikerê yan zî paştdayîşê DAÎŞî ra muhakeme bikerê.

-Paştdayîşê bi Îdareyê Xoserî yê Rojawanî bizêdînê û bi fermî ey bişinasnê.''