Badê erdlerzê ke Pazarcixê Mereşî de bi girdîya 7,7î qewimîya, hûmara merdeyan zêdîyena. Wezîrê Karanê Weşîye Fahrattin Kocayî vat: ''Erdlerzan de pêro pîya hezar û 651 kesan dinyaya xo bedilnaye. 10 bajaran de 11 hezar û 119 kesî birîndar bîyî, 3471 bînayî rijîyayî.''

Serekkomarê Tirkîya Tayyip Erdoganî da zanayene ke rîyê erdlerzî ra ewro ra heta 12ê sibate şîn ameyo ronayene. Wezîrîya Perwerdeyî da zanayene ke heme Tirkîya û Vakurê Kurdîstanî de mektebî semedê hewteyêkî ameyî tehtîlkerdene.

Hemsereka Pêroyî ya HDPyî Pervîne Buldan ameye Amed û merdimê kesanê ke binê rijnayîşî de mendê, zîyaret kerdî û dima ra masaya krîzî  de eşkerayîye daye.

Buldane vat: ''Ma zanê ke erdlerz nê îxmalkarîye û bêtedbîrîye mirnenê. Xora ma do muhasebeyê nê bikerê. Ma do îqtîdarî ra bipersê qey tedbîrî nêameyî girewtene. La ewro roja hesabpersayîşî nê roja piştişê derban û şenikkerdişê dejan a. Wextê  xelisnayîşê kesanê ke binê rijnayîşî de yo.''

Rêxistina HDPyî ya Amedî badê erdlerzî masaya krîzî na ro. Semedê her qeyde zanayîş û paştdayîşî numreyê 05418552102 û 05418552103 ra çew eşekeno bireso masaya krîzî.

Colemêrg de kampanyaya hetkarîye dîyaye destpêkerdene. Şirnex de HDPyî masaya krizî na ro la polîsan destur nêda eşkerayîye bidê. Semsûr de şar bi xo xebata xelisnayîşî rayra beno.