Hetkara Serekîya Koma DEM Partî Gulîstane Koçyîgît derheqê tecrîd, rewşa Meclîsî, hêrişanê vera ziwanî û destsernayîşê Şaredarîya Esenyurtî de ajansê ma rê qisey kerd.

Gulîstane ard ziwna ke Meclîs de goş nêdîyeno muxalefetî ser û vat: ''Îqtîdar Meclîs de bi temamî çarçewa menfaetanê xo de têgêreno û rexneyanê ma goşdarî nêkeno. Hetê bînî ra Meclîs de zafêr camêrdî qisey kenê. No zî ma aciz keno.''

Gulîstane bale ante hêrişanê vera kurdkî ser û vat: ''Hêrişê vera ziwan û kulturê kurdan nênê qebulkerdene. Wexto ke şaredarîyê ma ameyê xespkerdene hêverî qeyûman hêrişê dezgehan ziwan û kulturî kerd. Ganî ma hîna zaf wayîrê ziwan û kulturê xo vejîyê. Seba ke kurdkî biba ziwanê perwerdeyî ganî ma her ca de têkoşînî pîlêr bikerê.''

Gulîstane vist vîrî ek Rayber Apoyî de pêvînayîş ameyo kerdene la tecrîd dewam keno. Gulîstane vat: ''Birêz Ocalan seba çareserîya meseleya kurdan aktoro sereke yo. Coka ganî cade tecrîdê Îmraliyî bêro wedaritene. Eke babeta çareserîya meseleya kurdan de nîyetê înan est bo ganî bi lezî tecrîd bêro wedaritene. Xora tecrîd îşkence û sûcê vera merdimatîye yo.''

Gulîstane îfade kerd ke îqtîdarê AKPyî serra 2016î ra nata bi qeyûman welatî îdare keno û tewr peyên zî dest nayo Şaredarîya Esenyurtî ser. Gulîstane vat: ''Bêhuqûqîye hertim vila bena, qetî cayê xo de nêvindena. A raşte xespkerdişê Esenyurtî vera nasnameyê şaredar Ahmet Ozerî zî hêrişêk bîyo. Ahmet Ozer kurd o. Nasnameyê ey o kurd yeno hedefkerdene û o bi bahaneyanê viraşteyan tepişîya.''