Rayberê Şarê Kurdî Abdullah Ocalan, Omer Hayrî Konar, Veys, Aktaş û Hamili Yildirimî yê ke Îmrali de yê înan rê pêvînayîşê avûkatan û telefonî yê  seba 6 aşman amebi qedexekerdene. Avûkatanê Buroyê Huquqê Asrinî ra Sebay Kokluyî sîstemê Îmraliyî ercna.

Kokluyî sîstemê tecrîdê Îmraliyî sey leteyêkê Komployê 9ê Teşrîna Verêne name kerde û vat: ''Bi komployî ame waştene ke serewedartişê kurdan bêro şiknayene û kurdî sey verî  biciwîyê la plananê înan nêtepişt. Birêz Ocalanî bi kesayîtîye, îrade, fîkr û stratejîya xo planê hêzanê mîyanneteweyî pûç vetî. Çîyanê tewr muhîman ê brêz Ocalanî ra yew zî no yo ke vera komployî pardîgma vete werte. Birêz Ocalanî Îmrali açarna warê têkoşînî, sîstemê serdestî analîz kerdî û çareserîya modernîteya demokratîke û netewa demokratîke vetî verê tarîxî.''

Kokluyî bale ante ser ke bi sîstemê Îmraliyî dewleta tirke qanûnê xo bedilnayî û vat:  ''Bado ke 1999î de brêz Ocalan ardîya Tirîya sîstemê zindanê asayîşê berzî yo ke verî amebi ceribnayene la nêamebi caardene kewt dewre. Na grawe têna birêz Ocalanî rê ameye tehsîskerdene. Sîstemo ke game bi game Îmrali de semedê brêz Ocalanî ame averşîyayene bi sîstemê îdareyî yê Tirkîya. 2005 de seba brêz Ocalanî sîstemê înfaz, ceza û muhakeme yê tirkî kewt dewre. No sîstem caardişê ewroyî yê. Heta nika zîndanan de wina tecrîdo xorî çînêbi la nika xeylêk zindanan de nê caardişî kewtî dewre. Bi nê tewirî sîstemê tecrîdî yê Îmraliyî bi sîstemê îdare û huqûqî yê Tirkîya.''

Kokluyî vist vîrî ke Ocalan senî tesbîtanê raştan keno û wina dewam kerd:  ''Ewro xeylêk merdimê fikrî zî tesbîtanê brêz Ocalanî qebul kenê. Komployê vera brêz Ocalanî hemleya tewr stratejîke ya xorîkedişê şerî bî. Hela ke brêz Ocalanî rewşe tesbît kerde ra nata xîret kerd ke komployî pûç vejo û vera şerî îmakanê çareserîya demokratîkî biaferno. Brêz Ocalanî sîstemê Îmraliyî sey daylektîkî girewt dest û ma rê ramojna. Îmrali bi cayê pêrodayîşê şer û haştîye, darbe û demokrasîyî û kaos û çareserî. 

Brêz Ocalan rixmê bêîmkanîye û şertanê xo yê zehmetan game bi geme teorî û xîretkerdişê çareserî aver berd û kirişt merheleyêka newî. Prosesê Oslo netîceya xîretkerdişê brêz Ocalanî bi. Seba ke 'Xarîtaya Rayîrî' ya brêz Ocalanî raştîyî vetê meydan û xeylêk maskeyî dayî war, raşte nêrazîbîyayîşan ameye.

Xora tecrîdo giran badê na xarîta 2011 de dest pêkerd. Brêz Ocalanî mabênê 2013-15 de tarîxê dewleta tirke de reya verêne meseleya kurdî arde nuqtaya çareserî. Nê sîyasetî tarîx de cayê xo girewt. Coka mekaniqê darbe kewt dewre. Brêz Ocalanî her merhele de şertî qet behenê nêkerdî û semedê çareserî rolêko pîl kay kerd. Tirkîya ke ver bi felaketî şina.  Nizdîbîyayîşê brêz Ocalanî semedê xelisnayîşê şaranê herême û Tirkîya sey sîgorata yo.''

Avukat Serbay Kokluyî ke vatişê ''Îmrali labortuvarê zext û demokrasîyî yo'' yê heyetê Îmraliyî yê mîyanneteweyî vist vîr û vat: ''Sîstemê Îmraliyî cayê pêrodayîşê şer û haştîye yo.''