Hemserekê şaredarîyanê DEM Partî Amed de kombîyayîşêk de ameyî têhet. Hetkarê Hemserekanê DEM Partî Mehmet Ruştu Tîryakîyî kombîyayîşê hemşaredaran ra verî qisey kerd.

Tîryakîyî vist vîrî ke şarî 31ê adare de mojna ke ê sîyasetê qeyûman qebul nêkenê û vat: ''Qeyûman şaredarîyan de çîyêk nêverdayo û her çi roto. Rixmê nê meseleyan zî hemşaredarê ma kenê ke meseleyan çareser bikerê. La îqtîdar timûtim verê ma de astengîyan nano ro. 

Hukmatî tedbîrê tesarufî goreyê rewşa îdareyanê herêmîyan nêviraştê. hukmat bi biranê 'tedbîranê tesarufî' xizmetanê şaredarîyan asteng keno. Çime ma wesayîtanê meqamî de nîyo. La ganî aktîvîeyê kultur û hunerî nêrê astengkerdene. Şar wazeno tayê nefes bigêro. Tedbîranê tesarufî ra xizmetê ma yenê astengkerdene. Ma do na babete de wezîrîyan de zî qisey bikerê.''