Wekîlê DEM Partî yê Riha Omer Ocalan û avûkatanê Buroyê Huqûqî yê Asrinî ra Ozgur Faik Erolî zî tede heyetêk bajarê Strasbourgî yê Fransa de pêvînayîş kerdî. Yeno pawitene ke heyet ewro do CPTyî reyde zî pêvînayîş bikero.

Heyetî Konseya Ewropa de derheqê tecrîdî kombîyayîşê çapemenî kerd. Kombîyayîş de yo ke hetê Sarah Glynnî ra ame îdarekerdene, Omer Ocalan û Omer Faik Erol û parlamentero qirbrisij Constntinos Efstathiouyî qisey kerd. Xeylêk parlamenterê bînî zî tewrê kombîyayîşî bîyî.

Ozgur Faik Erolî qala şertanê Îmraliyî kerd. Erolî vîst vîrî ke 17 serrî yo avûkatê Ocalanî yo 2015î ra nate Abdullah Ocalan reyde pêvînîyîşî nînê kerdene û çar serrî yo testûrê pêvînayîşê keyeyan zî nêdîyeno. Avûkat Erolî nê vatî: “Îmrali de tecrîdo giran est o. No tecrîd huqûqî nîyo. No tecrîd goreyê qerarê polîtîkî yeno kerdene. Tecrîd vera çaraserîya meseleya kurdan yeno kerdene. Tirkîya derheqê şertanê Îmraliyî de qeraranê Mehkemeya Heqanê Merdiman a Ewropa zî nas nêkena. Zîndanê Îmraliyî qulêka tarî ya huqûqî ya. Seba ke Ewropa bêveng a, Tirkîya de çîyê winayên zêdîyenî.” 

Omer Ocalan zî bale ante problemanê huqûqî û sîyasî yê Tirkîya ser û vat: “Nê problemi tesîrê zîndanan kenê. Tirkîya de huqûq ameyo wedaritene û caardişanê keyfîyan cayê huqîqî girewto. Îmrali de çar serrî yo merdime tepişteyan nêeşkenê înan zîyaret bikerî. Heme heqê ma yê keyeyan ê huqûqî yenê xespkerdene. Qet cayêkê dinya de tecrîdo winayên çîn o. Çîyo ke Birêz Ocalan û hîrê embazanê ci rê yeno kerdene îşkence nîyo? Bi serran o verê Konseya Ewropa de şar nobete tepişeno. No veng çend reseno şima ma nêzanê. Şima hema çend bêveng manenê û nêvînayîşî ra yenê ma nê zî nêzanê. Waştişê ma meşrû yê. Ma reyna veng danê Konseya Ewropa, Parlamentoyê Ewropa û Mehkemeya Heqanê Merdiman a Ewropa bêhuqûqîya Îmraliyî vindarnê. Dezgehanê eleqedarî yê Ewropa ganî berpirsîyarîya xo bîyarê ca.” 

Parlamenterê Ewropa Constntinos Efstathiouyî zî bêvengîya Ewropa ya vera tecrîdî şermezar kerd û veng da ke wa dewletê Ewropa şirê Tirkîya ser ke verê tecrîdî bêro girewtene.