Komîteya Ekolojî ya KCKyî bi wesîleya erdlerzê Kurdîstanî eşkerayîye daye û nê pare kerdî:

''6ê sibate de merkezê Ci Kurdîstan bi girdîya 7.8 de erdlerz qewimîya. Bi seyan bînayî rijîyayî û bi hezaran kesî binê rijnayîşî de mendî. Rîyê tengayîya xebatanê xelisnayîşî û keyfîyetê dewlete ra mergî zêdîyayî.  Coka ma sere de merdeyan rê hûmayî ra rehmet û birîndaran rê şîfa wazenê. Ma hêvî kenê ke kesê binê xirabeyan de lazabez bêrê xelisnayene û şaro  xo yo ke  na roja dejî de paştî dano yewbînî rê serweşîye wazenê.

Seba ke erdlerzî teberê îradeyê ma de benî sey 'afata xozayîye' yenê pênaskerdene. La çîyê ke bi destê dewlete yenê rijnayene çirey afete nîyê. Warê rijnayîşî ke sey sehneyê qirkerdişanê komkîyan badê erdlerzî vejîyene werte, nê pêro afernayîşê merdimî  yê û sûcê merdimîye yê.

Dewlete de serê xetanê fayan de projeyê banan ê zixman nêvirazenê. Coka ê berpirsîyarê nê rijnayîş û qirkerdişan ê. Çunke ê  verê asayîşê  şarî hesabê rantî kenê. Îqtîdarê AKPyî xora estbîyayîşê xo deyndarê nê rantî yo. Erdogan û AKP berpirsîyarê nê qirkerdişan ê. Beno ke Erdogan bi xebera erdlerzî bîyo şa. Dewlete hema ke nêrasayebî  waranê xirabeyan,  afet îlan kerd û  semedê paştdayîşê mîyannetweyî veng da.

Sere de têgêrayîşê ekolojî û heme rêxitinê komelê sîvîlî ganî na raştîye bivînê goreyê nê têbigêrê.  Semedê dermanê deje û derbanê ma wa çew rejîmê faşîstî ra çîyêk mepawo. Ma paştîdayîşê komelkî bikerê gird û biresê gazîya şarê xo. Ma aktîf tewrê xebatanê xelisayîşî bibê, bi îmkananê xo derbanê xo bipeşê û rejîmê faşîstî ra hesab bipersê. Ma hêzê xo yê kontrolî hînî xurt  bişuxulnê ke hetkarîye ke yenê wa biresê kesanê ke hewceyê înan pê est o. Dejê şarê ma gird o. Ma pê wayîrvejîyayîşê yewbînan nê derban tedawî bikerê. Roje roja paştîdayîşî ya.''